Dialuna atardi Prome Minister Evelyn Wever-Croes a ricibi e grato bishita di señorita Guizza Maria Steenvoorde cu lo ta representando Aruba na Teen Universe 2025 proximamente na Punta Cana, Republica Dominicana.
E mainta aki Guizza a bin bishita Prome Minister pa comparti con e ta preparando pa representa Aruba dignamente. Guizza ta conoci como un hoben dinamico y cu experiencia den e mundo di pasarela y certamen.
Prome Minister a indica cu p’e semper ta un honor grandi pa topa y combersa cu nos hobennan prome cu nan bay representa Aruba den exterior. Semper e ta haci tur lo posibel pa yena nan cu curashi y animo cordando nan semper cu Aruba henter ta para nan tras y tin nan den nan curason, den pensamento y den oracion.
“Guizza ta otro embahadora digno di Aruba. E lo hiba e calor, beyeza y e inteligencia di e muhe Arubiano na e certamen internacional. Guizza, bo a prepara bon pa esaki y nos sa cu bo lo haci nos mas orguyoso ainda. Den nomber di Gobierno y henter e pueblo di Aruba, mi ta desea bo hopi exito”, Prome Minister a expresa.
