Por tèst/analisá kuminda I bibida aki na Boneiru mes
Direktorado di Supervishon i Mantenshon di Lei, den koperashon mutuo ku Bonlab, a start un proyekto piloto pa tèst kalidat i seguridat di kuminda i bibida na Boneiru.
E proyekto ku a kuminsá 4 di aprel 2025, ta un paso importante pa chèk kalidat i seguridat di kuminda/bibida.
Durante e proyekto piloto, inspektornan di e Direktorado i analista di Bonlab a subi kaya pa tuma muestra di kuminda i bibida.A hiba e muestranan despues na Bonlab pa investigá nan, segun regla di e laboratorio.
Meta di e proyekto ta pa sa kon ta pará ku higiena di kuminda i i bibida aki na Boneiru i pa haña mihó bista di esakinan den diferente sektor.
Bonlab a inougurá un departamento nobo resientemente, ku ta dirigí riba testmentu di produkto nan alimentisio pa asina garantisa seguridat i kalidat haltu di kuminda i bibida. E direktorado di supervision di mantenshon i lei su meta ta pa intensiva kontròl riba produktonan alimentisio.
Durante e promé dia di e proyekto piloto, a bishitá kuater establesimentu : un restorant, un karniseria, un bar, i un supermerkado ku su panaderia den sentro di siudat i zona industrial.
A tuma prueba na superfisie di mashin, tèst produkto kurú, salada, i a midi nan temperatura. A hiba e muestranan Bonlab pa investigashon.
Resultado di e tèstnan lo ta kla despues di mas o ménos 3 dia, Bonlab i Direktorado di Supervishon i Mantenshon di Lei. A analisá entre otro e siguiente mikro-organismonan:
Salmonèla
Listeria
Ékoli (bakteria ku ta haña den tripa)
Staphylococcus
Bacillus
Direktorado di Supervishon i Mantenshon di Lei i partner Bonlab lo sigui tuma muestra despues dje proyekto piloto. Ta usa resultado dje investigashon pa konsientisá esnan embolbí i tene kontrol riba kalidat i seguridat di kuminda i bibida mas dirigí.
