Ayera, e tripulashon di e avion di Wardakosta a risibí un ‘mayday call’ durante un buelo di patruya. Un kapitan riba su katamaran a indiká via radio ku su boto tabata yenando ku awa i ku e tabatin mester di asistensia. E katamaran tabata situa mas o ménos 130 miya nortost di Boneiru. Despues ku e tripulashon di e avion di Wardakosta a tuma kontakto ku e kapitan, nan a tuma kontakto ku e Sentro di Operashon Marítimo (MOC) di Wardakosta pa kordiná e reskate di e kapitan. Komo ku no tabatin un barku den serkania di e katamaran ku por a asisti esaki, MOC a disidi di desplega e helikòpter di Wardakosta pa reskatá e kapitan.
Na yegada di e helikòpter na e katamaran, e tripulashon a duna asistensia na e kapitan i a sak’é for di e katamaran. Despues a hiba e kapitan pa Kòrsou kaminda a entregá e
kapitan na ofisialnan di imigrashon ku lo kordiná su biahe di regreso kas.
