Recientemente, Minister di Husticia, mr. drs. Arthur Dowers, a realisa un bishita di trabao importante na Marinierskazerne Savaneta, unda e mandatario a tene reunion cu funcionarionan di Koninklijke Marechaussee y Recherche Samenwerkingsteam. E bishita aki ta parti di un esfuerso continuo pa fortifica e colaboracion strategico entre e Ministerio di Husticia y entidadnan cu ta fundamental den proteccion di frontera y combati crimen na frontera.
E rol di Koninklijke Marechaussee na Aruba ta crucial: brinda sosten pa Cuerpo Policial Aruba, Departamento di Immigracion y otro entidadnan, particularmente den lucha contra crimen organisa, traficacion di hende y deteccion di documentonan di identidad falsifica. Minister Dowers a enfatisa cu e colaboracion di Marechaussee den entrenamento di e personal di Immigracion, specialmente den detecta documentonan falsifica, ya a resulta den un miho proteccion di nos frontera.
Minister tin confiansa cu e cooperacion valioso aki lo sigui riba un base regular.
Durante su bishita, Minister Dowers a reuni cu e unidad di Intelligence Center Grens Aruba y Coördinatiecentrum Mensenhandel Mensensmokkel Aruba (CMMA). IC-Grens Aruba ta enfoca riba prevencion di traficacion y contrabanda di hende, mientras CMMA tin un rol mas preventivo y ta sirbi como punto di informacion pa comunidad Arubano relaciona cu e tema aki.
For di su fundacion, CMMA a crece considerablemente den su capacidad, tareanan y red di cooperacion, trahando schouder cu schouder cu entidadnan nacional y internacional manera KPA, Aduana, Immigracion, Koninklijke Marechaussee, VDA, NCTVI y Kustwacht.
Minister Dowers a expresa su aprecio enorme pa e progreso logra, pero tambe a indica cu tin espacio pa mehoracion den infrastructura, capacitacion, material y cantidad di personal. E titular di husticia a compromete cu lo sigui inverti den e aspecto esencialnan aki, cu un solo meta, un Aruba mas sigur pa tur ciudadano.
