Diadumingo awor 1 di juni, di 10:30 pa 17:00, edificionan historico y monumentonan den San Nicolas lo habri nan porta pa publico cu diferente actividad.
Stichting Monumentenfonds Aruba den colaboracion cu Departamento di Cultura Aruba lo organisa e di dos edicion di Open Monumentendag. Pa medio di actividadnan, recoridonan den bus of na pia, speurtocht y presentacionnan, e comunidad lo por siña un tiki mas di e historia di San Nicolas y haya e oportunidad di conoce algun di e casnan y monumentonan.
E evento lo inicia na Watertoren San Nicolas caminda lo tin un apertura oficial pa 10:30 di mainta cu un bunita presentacion dirigi pa John Freddy Montoya, acompaña pa Mabelline Arends Croes cu coro Tutti Frutti y diferente agrupacionnan di baile. Na e Water Toren lo por ricibi e foyecto di informacion cu tur actividadnan na cual lo por participa e dia aki.
Algun monumentonan cu lo habri nan portanan:
Watertoren San Nicolas | Bernhardstraat 164: Punto di inicio pa ricibi foyeto di informacion
Museo di Industria lo tin un mini speurtocht paden y contamento di storia na e di dos piso cada trinta minuut.
Nicolaas Store | B v/d Veen Zeppenfeldstraat 27:
Bishita e museo di comunidad y siña un tiki di e historia di San Nicolas, participa na un mini speurtocht paden di e museo cu chens pa gana premio.
Uncle Louis Store | B v/d Veen Zeppenfeldstraat
Cera conoci cu e edificio di Uncle Louis Store un monumento cu a gana 2 premio desde su restauracion. Haya informacion di e trabounan di Directie Natuur en Milieu y e arkitecto cual tabata encarga cu e restauracion.
Cas di Famia Vorst | Caya Dick Cooper 15
Bishita e prome cas di cunucu di San Nicolas y siña un tiki di e historia di famia Vorst.
Cas di Famia Hope | Caya Sint John 21
Un cas di cunucu di palo di mas di 90 aña bieuw, lo habri su portanan y pa 4 or di atardi lo tin un presentacion musical special di Watra.
Misa Santa Teresita
Tambe lo habri su portanan e dia aki pa publico
Lo tin diferente actividad caminda lo por participa y cu chens pa gana premio.
Monument Hunt
Participa cu famia na e Monument hunt. Download of reinstala MyAruba app. Forma bo grupo y participa pa gana premio. Pa mas informacion www.monumentenfondsaruba.com
Exposicion Biba nos Herencia. Un proyecto di 2 aña cu diferente retonan di fotografia, lo termina cu un exposicion durante e Open Monumentendag y un revista online crea pa e boluntarionan di e proyecto.
Na biblioteca Nacional San Nicolas lo tin diferente presentacion;
Lectura: San Nicolas den siglo 20 presenta pa Leon Berenos, lo hiba nos bek den e historia y desaroyo di San Nicolas.
E proyecto Wikipedia riba Aruba tambe lo presenta informacion di e proyecto y con e publico por contribui na amplia e informacion tocante Aruba su herencia cultural na Papiamento riba e enciclopedia mas grandi di mundo.
Tours:
Lo tin 3 diferente Toursnan cu guia den bus cu lo recore un parti mas grandi di San Nicolas.
E Bus lo Sali for di Teresita Center.
Pa 15:00 Lo tin un Mural tour cu guia di Tito Bolivar. Punto di inicio lo tan a Artisa.
Pa 15:45 lo tin un tour titula “Nostalgia” den Village bou di guia di Sr. Leon Berenos.
Punto di encuentro lo ta na e estatua di Lolita.
Arts, Crafts y Fotografia.
Na Teresita Center lo tin diferente actividadnan pa mucha, manera tayer di fotografia, tayer di pintura y obra di man.
Weganan riba Wiel:
IBISA y CEDE Aruba a pone WAW Mobiel disponible pa asina e muchanan cu bishita e Open Monumentendag lo por diberti haciendo movecion durante e evento.
Tayer di Pintura:
Space 21 y Artisa lo habri e portanan di nan galerianan pa un y tur por bishita y inspira.
Uza e inspiracion aki durante un tayer di pintura pa adulto pa 14:00 na Artisa.
San Nicolas Pop Up Market:
Bishita e pop Up Market na B v/d Veen Zeppenfeldstraat pa artesania, pasa boca y hopi mas.
Lo tin tambe diferente comerciantenan di San Nicolas cu lo habri nan porta e dia aki pa ofrece e publico lo mihor den sabor local di Aruba.
No perde e oportunidad pa bishita Open Monumentendag diadumingo awor dia 1 d juni cu henter famia, explora e monumentonan, conoce nan historia, participa den diferente actividadnan y cu chens pa gana hopi premio!
Pa mas informacion bishita nos pagina di Facebook: Stichting Monumentenfonds Aruba.
Of Instagram: @monumentsfundaruba