Ofisina nobo ta kontribuí na mas fortifikashon di diálogo, edukashon i konmemorashon den parti Karibense di Reino
parti anochi, a habri e ofisina di Komité di Konmemorashon Pasado di Sklabitut na Sint Eustatius. E apertura ta marka un paso importante den konmemorashon i diálogo struktural di e pasado di sklabitut riba e isla i den region.
Durante e seremonia presidente di komité Astrid Elburg, diputado enkargá ku Kultura Rechelline Leerdam, hefe di e ofisina na Sint Eustatius Raimie Richardson i Lucia Beck, direktor di e Komité di Konmemorashon Pasado di Sklabitut den parti karibense di Reino, a hiba palabra.
Astrid Elburg tabatin un mensahe poderoso: “Nos ta habri porta di nos ofisina nobo aki na Sint Eustatius. Pero simbólikamente nos ta habri algu hopi mas importante: un porta pa por forma parti di e totalidat, pa por ta bo mes den tur sentido di e palabra. Un porta pa un futuro kaminda nos ta honra e bèrdat kompleto di nos historia.”
Diputado Leerdam a indiká: “Mi ta spera e ofisina aki bira un testimonio di nos pasado – un foro pa diálogo den presente i un fuente di speransa pa nos futuro – un futuro den kua nos ta keda transformá di víktima pa vensedó, pará firme den forsa di nos patrimonio kompartí i e resiliensia di nos komunidat.”
Raimie Richardson a enfatisá e poder intrínsiko di emansipashon: “Emansipashon no ta algu fiá òf duná; e ta algu ku ta presente for di komienso – e ta parti di ken nos ta for di komienso di tempu. E ta algu ku ta biba den nos, algu ku nos ta eksigí dor di komprenshon, orguyo i resiliensia.” El a finalisá su diskurso ku un yamada pa union. “No laga e ofisina aki ta djis un lugá kaminda nos ta konmemorá, pero tambe un lugá di forsa. Pa nos kòrda ku nos pasado no ta un kadena, pero un paso dilanti. I miéntras nos ta wak dilanti, laga nos hasi esaki ku orguyo, propósito i den union.”
Lucia Beck a klousurá e parti ofisial ku palabranan tokante di futuro i generashonnan: “Awe ta marka un komienso nobo. Huntu nos ta drenta un kapítulo nobo – unu yená ku bèrdat, sanashon i transformashon. Nos ta bai realisá kosnan grandi – no pa nos mes, pero pa e generashonnan di futuro. Pa esnan ku mester kana e kaminda aki ainda, mester tende e nòmbernan aki ainda i lo sa ku nan ta forma parti di algu mas grandi.”
Antorcha di emansipashon
Despues di e diskursonan tabatin un momentu mashá spesial riba e plenchi, kaminda a entregá e antorcha di emansipashon na Joshua Spanner i Ishn Courtar, ku alabes a fungi komo maestro di seremonia durante e anochi aki. E antorcha simbóliko aki ta guia e kaminda pa traspaso di konosementu di generashon pa generashon.
Pa hopi aña kaba Joshua Spanner ta e motor tras di konmemorashon di abolishon di sklabitut na Sint Eustatius. Hopi tempu promé ku diskulpa di Hulanda, e tabata lucha inkansabel pa rekonosementu. Su esfuersonan tabata inkluí bishita na skol i vários programa tokante di e patrimonio Afrikano i konmemorashon di e antepasadonan sklabisá na e isla. Ora el a risibí e antorcha el a enfatisá: “Nunka un antorcha tabata e kos. Ta nos antepasadonan semper tabata mustra e kaminda.”
Ishn Courtar ta un hóben di Statia ku ta komprometé ku alma i kurpa pa mantenshon i promoshon di patrimonio kultural i hubentut na Sint Eustatius. E ta un defensor di e kultura i historia di Statia, ku di forma aktivo ta kontribuí na fortifikashon di identidat kultural bou di hóben.
Eksposishon ‘NOS: Kaminda pasado i presente ta topa’
Mas anochi a presentá e eksposishon ‘NOS: Kaminda pasado i presente ta topa’. E eksposishon di video trahá ku Inteligensia Artifisial, ta konta e historia di tempu promé ku sklabitut na Afrika, e komèrsio di katibu transatlántiko, héroenan di parti karibense di Reino i na Sürnam, emansipashon i e diskulpa di Hulanda pa e ròl ku el a hunga den pasado di sklabitut.
Ku apertura di e ofisina i eksposishon e Komité di Konmemorashon di Pasado di Sklabitut ke kontribuí na diálogo, edukashon i konsientisashon duradero – tantu na Sint Eustatius komo den hinter region.
E ofisina na Sint Eustatius ta e di dos ofisina di e Komité den parti karibense di Reino. Riba 25 di mei a habri porta di e ofisina na Kòrsou. Na Hulanda a habri e ofisina na Den Haag na aprel. Ku e tres ofisinanan aki por sirbi hinter Reino. A skohe konsientemente pa Kòrsou i Sint Eustatius pa e ròl prominente ku e dos islanan tabatin den pasado di sklabitut.
