Seis luna a pasa desde cu Ayden Lanooi, un hoben di apenas 19 aña, a perde su bida den un forma brutal y inhumano; 20 bala a bay cu su futuro, su soño y su bida. Seis luna di dolor, silencio y pregunta sin contesta. E silencio di Ministerio Publico ta manera un bofta den cara di un comunidad cu kier y tin derecho pa transparencia y husticia. Den un pais, unda tur dia ta papia di ley y orden, con por ta posibel cu den un caso asina grave, e institucion cu tin e responsabilidad di mas grandi pa persigui husticia ta keda asina keto y distancia?
Un silencio cu ta mata speransa
“Tur famia y comunidad merece claridad y accion. No ta solamente un caso di polis, esaki ta un caso di dignidad humano. Ora un hoben di 19 aña fayece na man di 20 bala ta un tragedia cu mester sacudi tur skina di Aruba. Pero en bes di haya contesta, pueblo y famia ta haya un silencio friu, un silencio cu ta alimenta duda, dolor y rabia. Ministerio Publico, unda bo ta? Ta bo obligacion pa duna claridad, pa mustra cu ningun bida no ta sin balor y cu ningun crimen no por keda sin consecuencia”, Otmar a enfatisa.
Husticia mester ta pareu pa tur hende
E situacion actual ta manda un mensahe hopi peligroso y preocupante: cu si bo tin suerte of si bo caso no ta “popular”, bo por keda warda eternamente pa husticia. Esaki ta cosecha desconfiansa di pueblo den un sistema hudicial y ta habri e porta pa mas violencia y desesperacion. Otmar Oduber di PPA ta insisti: “Husticia mester ta igual pa tur hende, sin distinction di nada y e silencio di Ministerio Publico ta completamente inaceptabel. Aruba no por sigui cu un sistema, unda silencio y pasividad ta gana tereno riba transparencia y accion”.
Oduber ta cuestiona Ministerio Publico relaciona cu cuanto tempo mas mester warda pa trata cu respet e memoria di e hoben fayeci y pa calma dolor di su famia? Cuantu luna mas mester pasa pa bo mustra cu husticia ta mas fuerte cu miedo of interes? E pueblo no ta pidiendo un fabor. Nan ta exigi nan derecho! “Husticia no por ta un luho, e ta un derecho di pueblo!” Otmar a termina bisando.