Fraccion di MAN-PIN den Parlamento di Corsou a entrega oficialmente e Ley di Verlof pa Tata, cual ta cla pa keda trata den Parlamento. Cu e proposicion aki, MAN-PIN kier introduci un derecho legal pa tatanan tambe haya verlof paga despues di nacemento di nan yiú.
E iniciativa ta representa un paso importante den fortalecimento di famia, igualdad entre hende homber i muhe, i bienestar di e mucha desde e prome dianan di bida, pero tambe un avance den derechonan laboral. Actualmente, hopi tata na Corsou no tin ningun derecho legal pa keda cas despues di nacemento di nan yiú, i hopi biaha nan mester usa dianan di vacacion of sigui traha den un momento hopi importante pa e famia.
Cu e ley aki, MAN-PIN kier cambia esaki i pone Corsou mas alinea cu desaroyo moderno laboral i humano. E ley ta propone pa e empleado por tin derecho riba Verlof di Tata paga, cual ta keda determina segun e cantidad di ora cu e empleado ta traha pa siman.
E ley tambe ta tene cuenta cu sostenibilidade financiero di e sistema di seguro social i cu e realidad di e mercado laboral na Corsou. Segun fraccion di MAN-PIN, e iniciativa no solamente ta trata di un beneficio laboral, sino di un inversion den desaroyo humano, salud mental, stabilidad familiar i futuro di nos muchanan.
Fraccion di MAN-PIN ta spera cu Parlamento lo trata e ley cu e seriedad cu e tema ta merece i cu Corsou finalmente lo duna reconocemento legal na e rol importante di e tata den famia. Un famia fuerte ta cuminsa cu presencia, cu amor i cu responsabilidad comparti.
Verlof pa Tata no ta un luxo, sino un paso necesario pa un sociedad mas humano i mas justo. MAN-PIN ta sigui compromete su mes cu politica social progresivo i inovativo, cu realmente ta pone hende, famia i dignidad humano den centro di e desaroyo di Corsou