Durante último añanan a konosé un kresementu rápido di embehesimentu. Embehesimentu na mes momento ta un dje motibunan den e sifranan kresiente di personanan ku demensia.
Den kuadro dje problema di embehesimentu, Fundashon Alzheimer pa 26 aña kaba riba un base boluntario ta brinda servisio i informashon na komunidat, pa medio di enkuentro i charlanan ku nan ta organisá riba un base regular. Dje forma aki, Fundashon Alzheimer ta yuda eduká komunidat, pero alabes duna esnan ku ta kuida e persona ku alzheimer, tepnan balioso kon pa atendéku e persona enkuestion.
Mirando e trabou balioso ku Fundashon Alzheimer ta hasiendo ya pa 26 aña konsekutivo, Frakshon di MFK durante tratamentu di presupuesto pa aña 2026 a presentá un moshon ku e petishon pa Gobièrnu evaluá e posibilidat pa duna Fundashon Alzheimer un “eenmalige subsidie”.
Frakshon di MFK ta sumamente agradesido ku Gabinete Pisas III huntu ku Minister di salubridat, Tyron Boekhoudt resiéntemente a kumpli ku e moshon i a otorgá un supsidio di Xcg 36.000,00 na Fundashon Alzheimer, di manera ku nan por kontinuá ku e trabounan ku nan ta desplegá.
Fundashon Alzheimer, pa medio di e presidente sra. Chanerika Hellement durante un mainta di informashon na Sentro di Bario Brievengat, a ekspresá palabranan di gratitut na Gobièrnu pa e sosten finansiero risibí. E sosten finansiero aki sigur ta duna e fundashon e empuhe i forsa nesesario pa kontinuá ku e trabou ku nan a bin ta hasi ya pa mas ku 26 aña.
Frakshon di MFK ta gradisí Gabinete Pisas III i Minister Tyron Boekhoudt pa kumplimentu ku e moshon i na mes momento ta deseá Fundashon Alzheimer hopi forsa i sabiduria, pa sigui ku e bon trabou.
