Camara di Comercio (KvK) a celebra su di 95 aniversario cu un networking reception na Zima Rooftop Bar na JOIA. Directiva y Personal di KvK tabatin e honor pa ricibi algun stakeholders, entre otro relacionnan empresarial, ex-presidentenan, ex-miembronan di Directiva y sponsors di e evento WEB Aruba, VCC International y Sagicor Life, pa hunto conmemora y celebra e logro signifcante aki.
Desde su establecimento na aña 1930, Camara di Comercio a hunga un rol fundamental den desaroyo economico di Aruba y a fungi como un institucion di confiansa pa empresanan den tur sector. Durante casi un siglo, KvK a dedica su mes pa sostene y guia negoshinan, stimula inovacion y promove desaroyo economico sostenibel na Aruba.
E 95 aniversario di KvK ta un motibo di orguyo, no solamente pa e organisacion mes, pero tambe pa henter comunidad empresarial. Durante decadanan, cumpliendo cu su teareanan manera stipula den ley, KvK a representa comercio, yudando empresanan pa establece y crece riba mercado, duna conseho y percura pa fortalece laso cu sector publico. KvK ta sigui comprometi pa continua cu e papel importante aki, cu bista riba e proximo ‘milestone’, cual ta e centenario.
E celebracion a duna oportunidad pa reflexiona riba e trayectoria largo di KvK, como tambe un ocasion pa enfoca riba futuro y con comercio lo evoluciona den e añanan benidero. Invitadonan a gosa di intercambio signifcante, comparti experiencianan y celebra e progreso di sector empresarial di Aruba.
Camara di Comercio ta expresa su aprecio sincero na tur su clientenan, partners, stakeholders y sponsors pa nan confiansa y colaboracion durante tur e añanan. Hunto nos kier sigui construi un comunidad empresarial resiliente y prospero pa Aruba.
