Bou liderazgo di presidente di comision di asuntonan di reino y relacionan exterior, Jennifer Arends-Reyes, delegacion di Aruba a completa un serie di dianan di trabou intenso na Hulanda, caminda a pone atencion principal riba e relacion entre Aruba, Corsou y St. Maarten como parti di e agenda di Tripartite, pero tambe cu Hulanda den marco di e reunionan di IPKO.Durante e sesionnan a discuti diferente topico esencial pa tur isla, incluyendo e situacion geopolitico, enseñanza, finanzas publico y e reto creciente di vergrijzing (embehecemento di poblacion). Arends-Reyes a enfatisa cu “Cooperacion y respet mutuo ta fundamental pa nos continua traha hunto den un Reino unda cada pais por sigui desaroya na base di igualdad y nan autonomia.”
Un punto central di discusion tabata e situacion di studiantenan Caribense na Hulanda, cu ta enfrenta reto den seguro, vivienda y debe studiantil. E delegacion di Aruba a reuni cu e Nationale Ombudsman, caminda a destaca e mehoranan logra te awor y a evalua manera cu Aruba por contribui pa un sistema mas husto y eficiente.
Durante un bishita na Haagse Hogeschool, e delegacion a scucha directamente di e studiantenan nan preocupacion y expectativa tocante nan bienestar, tanto na Hulanda como ora nan bolbe nan pais.
Tambe, den marco di e 70 aña di Statuut di Reino, a trata e tema di consensus Rijkswet y e posicion di Aruba den e parti di finanzas publico post-COVID. Segun Arends-Reyes, “E dialogo ta mustra cu nos por busca un win-win situation, caminda Aruba y Hulanda por sigui colabora cu otro.”
E reunion di IPKO a confirma un ambiente di dialogo habri y constructivo entre e islanan y Hulanda. Miembronan di e delegacion representando Partido di Pueblo Arubano (AVP) lo sigui di cerca tur desaroyo cu ta na beneficio di nos pueblo y pa fortifica e lazo di cooperacion den Reino.
