Awe Corte Comun di Husticia (Hof) a dicta sentencia den e caso penal contra e sospechoso G.F.B., minister plenipotenciario anterior di Aruba na Hulanda. E caso aki, conoci como Tulipan, ta trata di malversacion di fondonan publico y abuso di funcion durante e periodo di 2017-2022 na Arubahuis.
Corte den Prome Instancia dia 13 di juni 2025 a declara G.F.B. culpable na malversacion y maluso di funcion y a condene na un castigo di prison di binti luna, di cual diez luna ta condicional, cu un tempo di prueba di tres aña. Corte tambe a dicta sentencia tocante e demanda di decomiso (ontnemingsvordering) contra e ex-minister plenipotenciario, den cual el a duna ordo na G.F.B. pa paga Pais Aruba un suma di Afl. 138.688 bek.
Dor di e abogado di e sospechoso apelacion a wordo entama dia 30 di juni 2025. E la informa anteriormente dia 27 di juni 2025, pa medio di un correo electronico pa griffie y ministerio publico cu e sospechoso kier bai den apelacion. E correo electronico aki a wordo risibi 5:18 pm.
E punto di bista di ministerio publico durante e tratamento di e apelacion entama ta cu como cu e sentencia a wordu dicta dia 13 di juni 2025 contra G.F.B. “op tegenspraak”, e sospechoso mester a apela no mas laat cu 27 di juni 2025. Segun hurisprudencia constante di Corte Supremo, un recurso legal ta considera den termino di apelacion solamente si e ta entrega den ora di trabou di e griffie. Segun website di Corte, e griffie ta sera 4:00pm. Pues griffie tabata sera caba 5:18pm. Pesei e apelacion
ta wordo considera di ta entama e siguiente dia di trabou. Esei no ta den e termino den cual e apelacion por wordo entama.
Awe mainta Hof a dicta sentencia conforme e punto di bista di ministerio publico y a declara e apelacion di G.F.B. no admisibel. Cu esaki e sentencia di 13 di juni 2025 ta irreversibel.