Segun Parlamentario Hendrik Tevreden, e reunion cu a tuma luga e siman aki den Parlamento a wordo pidi casi 8 luna pasa door di Fraccion di MEP y PPA, pa haya sa con tabata bayendo cu e Rijkswet. Pasobra te cu augustus no tabata sa nada di esaki, te ora cu a mira e Ministernan Mike Eman, Geoffrey Wever y Gerlien Croes entrega e Rijkswet na Rijksministerraad. Kibrando cu tur palabracion haci den Reino di e peoceso cu mester encamina pa ricibi concensus.
Si bay bek den tempo unrato, ta mira cu na 2022 Parlamento di Aruba, Sint Maarten, Corsou y Eerste y Tweede Kamer a yega na e palabracion cu ora ta trata Rijkswet, Gobiernonan di paisnan no por continua cu un proceso sin cu e pasa den Parlamento di e pais prome (den e caso aki Parlamento di Aruba). No obstante esaki, ta mira cu 14 di augustus gobierno di Aruba a bay cu e concepto di Rijkswet direct Hulanda y entrega esaki na Rijksministerraad, contrario na palabracionnan haci den Reino pa loke ta con ta trata cu Rijkswet.
Locual cu gobierno a haci bayendo Hulanda ta, kita e chens di Parlamento di Aruba pa trata e ley di Rijkswet HOFA y trece cambio na dje den Parlamento, prome cu e yega Rijksministerraad. Awo mester warda te ora cu e ley yega Tweede Kamer, eorey Parlamento di Aruba por manda un verslag pa Tweede Kamer y si nan kier, consecuentemente nan por presenta locual cu tin den e verslag ey. Y pa nan haci esaki, mester tin un mayoria den Tweede Kamer.
Parlamentario Tevreden a bisa cu un di e rasonnan cu gobierno ta bay dilanti cu e Rijkswet aki ta pa spaar 11 miyon florin anualmente riba e prestamo cu a wordo haci den periodo di Covid. Pues practicamente bo ta entrega bo liberdad financiero y status aparte pa spaar 11 miyon florin pa aña. E por zona mane hopi pa algun, pero ora bo pais ta genera 7,1 biyon florin na entrada pa aña, 11 miyon no ta bal e libertad cu bo tincu entrega pa haya reduccion riba bo interes, sr. Tevreden a indica.
A pesar cu e situacion ta dificil, sr. Tevreden a bisa cu lo bay sigui lucha contra di e Rijkswet. Di 9 parlamentario cu tabata contra e Rijkswet, awe e cantidad a bira 10, si yega 11 parlamentario e ora no tin consensus y no tin Rijkswet HOFA ya cu Parlamentario Mike de Meza tambe ta contra. Asina ta spera cu e cantidad bira mas y yega e mayoria den Parlamenro cu ta contra di e Rijkswet, eorey posiblemente por presenta esaki tambe den verslag pa Tweede Kamer. E lo tabata mihor cu Parlamento a bay contra di esaki awo, pero lamentablemente esey no ta e caso y Parlamento di Aruba no por opina riba dje aworaki mas, sr. Tevreden a termina bisando.