Tourism Corporation Bonaire (TCB) ta kontentu di por anunsiá firmamentu di un Deklarashon di Intenshon (Memorandum of Understanding – MOU) pa 2026 ku e sambuyadó boneriano di 18 aña Isabel Arango.
Isabel, kende a nase i lanta na Boneiru, a kompletá su promé buseo tempu ku e tabatin apénas ocho aña i for di e tempu ei e tin mas ku 120 buseo riba su nòmber. Su pashon pa sambuyamentu ta sigui krese, meskos ku su interes den hasi presentashon i konta storia.
Pa medio di e kolaborashon akí TCB ta bai sostené Isabel den su desaroyo mas aleu komo sambuyadó hóben i den su esfuersonan pa inspirá otro hende, partikularmente hóbennan, pa deskubrí e mundu bou di laman. Komo parti di e kolaborashon akí, mas lat den e aña akí Isabel ta bai partisipá na Diving Talks na Portugal, kaminda e ta haña oportunidat pa kompartí su eksperensianan i su trayekto komo sambuyadó hóben for di Boneiru.
“Isabel ta un tremendo ehèmpel di e talentonan lokal hóben ku Boneiru tin pa ofresé. Nos ta kontentu ku nos por sostené su desaroyo i brind’é un oportunidat pa kompartí su pashon pa sambuyamentu i representá Boneiru riba nivel internashonal”, segun Elesiër Angel, direktor di Tourism Corporation Bonaire.
Pa Isabel, sambuyamentu ta trata di mas ku solamente eksplorashon di e mundu bou di laman. E ta spera di por mustra nos hóbennan ku dentro di e deporte akí tin hopi posibilidat pa deskubrí i di por inspirá nan pa pone e prome paso pa hasi esaki.
“Mi ke sigui krese komo sambuyadó i na mes momentu inspirá otro hóbennan pa deskubrí kiko tin bou di laman i pa mira e oportunidatnan ku sambuyamentu por ofresé”, asina Isabel a kompartí.
E kolaborashon akí ta forma parti di e esfuersonan kontinuo di TCB pa sostené talentonan lokal i krea oportunidat pa bonerianonan hóben desaroyá nan abilidatnan i representá nos isla riba un tarima internashonal.
