E Escudo di Aruba a cumpli 70 aña riba 15 di november 2025 y Parlamentario Xiomara
Maduro ta felicita Pueblo di Aruba cu e aniversario importante aki di un di e simbolonan di
nos identidad cu ta resalta ken nos ta como Pueblo y Pais.
Parlamentario Xiomara Maduro ta gradici Departamento di Cultura y specialmente UNOCA
cu a dedica atencion special na e aniversario special aki. Departamento di Cultura a pone
informacion riba nos Escudo disponibel riba nan website www.cultura.aw. UNOCA a
presenta un serie special di 6 edicion den cual den cada edicion a para keto na cada un di e
simbolonan representa den e Escudo di Aruba. Un produccion visual hopi bunita, educativo,
di calidad halto y den nos dushi idioma Papiamento a keda presenta.
Den cada edicion di e serie, a splica e significacion di un detaye inclui den e Escudo di
Aruba. Di e manera aki nos tur por haya sa mas di e motibo pakico e Aloë, Hooiberg y Lama,
Cruz Blanco, Wiel, Dunamento di Man, Leon y Laurel ta forma parti di e Escudo di Aruba.
Por mira nan riba Facebook di UNOCA, Povi-tree y riba Youtube UNOCA Cares Channel.
E Parlamentario ta gradici sr. Levy Geerman di Povi-tree pa tur su dedicacion y esfuerso pa
produci y presenta e serie aki na un manera cu ta duna hende hopi gana pa sa mas di nos
historia y sa ken nos ta como Pais.
Tipo di programa asina ta importante pa educa nos hobennan, grandinan y tur cu a haci di
Aruba nan cas. Pesey Parlamentario Xiomara Maduro como ex Minister di Cultura, ta haci un
yamado na UNOCA y na Minister di Cultura Eman pa transmiti e serie aki via nos planta
nacional Telearuba pa asina na Aruba y mundo por cera conoci mas di cerca cu un di e
simbolonan cu ta forma parti di nos identidad Arubiano.
