Riba e fecha tan significante di 25 di januari, Aruba henter ta para keto pa conmemora e
natalicio di e homber cu a cambia rumbo di nos historia: Gilberto François "Betico" Croes. E
aña aki un biaha mas, nos ta celebra no solamente un fecha riba e calenderio, sino e spirito di
determinacion y e amor profundo pa patria cu Betico a sembra den curason di cada Arubiano.
Dicon nos ta record’e?
Conoce nos historia no ta djis un acto di memoria, sino e fundeshi pa nos futuro. Ta
fundamental pa e generacionnan nobo compronde cu e libertad y e bienestar cu nos ta goza di
dje awe, no a bin di mes. Nan tabata e resultado di un lucha incansabel, un vision cla y un
union nacional sin precedente bou di e liderazgo di Betico Croes.
Nos Libertador y Arkitecto
Nos ta yam’e nos Libertador pasobra e tabata e lider cu a kibra e cadenanan cu tabata stroba e
potencial di nos isla, duna Aruba su propio bos y su propio destino. Como e Arkitecto di nos
Status Aparte, Betico a diseña e structura politico cu a permiti Aruba bira un pais autonomo
den Reino Hulandes. El a percura pa nos Himno y Bandera, simbolonan cu ta uni nos como
un solo pueblo, un solo nacion.
Yamada na henter comunidad
Pa e Dia di Betico 2026 aki, mi ta haci un yamada na henter e comunidad di Aruba—di
Noord pa San Nicolas—pa nos bisti nos colornan nacional cu orguyo y celebra su lucha y
logronan cu a brinda nos e bida cu nos tin awe.
• Rindi honor: Ban bishita e monumentonan, participa den e actonan oficial y comparti e
historianan di Betico cu nos yiunan.
• Celebra nos Union: Ban participa den e actividadnan cultural, deportivo y social cu lo
tuma luga rond di nos isla.
• Hisa nos Bandera: Laga nos bandera nacional bula halto den tur skina di nos isla como
simbolo di gratitud na e homber cu a kere den nos capacidad ora ningun otro hende tabata
kere.
Aruba, ban uni den un solo curason pa duna Betico Croes e honor cu e merece. Su herencia ta
biba den nos progreso, den nos libertad y den nos orguyo di ta Arubiano.
Invitacion pa bin celebra hunto cu Partido MEP
Desde 10’or di mainta nos celebracion ta inicia na Cede di MEP cu nos acostumbrado
koffiemorgen, ambiente di caha di orgel y un torneo di mini futbol di edad 6-8 aña. Lo tin un
exposicion henter dia den Cede y pa 2’or di atardi lo tin un torneo di domino lo inicia. Alabes
di 2’or nos programa cultural ta start riba stage principal. Pa culmina e celebracion nos lo tin
bandanan Duro у Tsunami di 6’or di atardi te cu 9’or di anochi. Tin 16 tent cu masha hopi
cuminda y pasa boca, un variedad grandi pa un y tur. Y no por keda sin menciona cu MEP tin
su tremendo rifa cu premionan di Afl.10.000, – y Afl. 5.000,- cash cual sorteo lo tuma lugar
pa 7 di anochi. Nos ta warda pueblo en general pa pasa celebra hunto cu nos y percura cu bo
liña ta na awa! Por cumpra ticket cerca tur candidato di MEP.
Mi kier termina deseando pueblo completo di awor caba un Feliz Dia di Betico!
Shailiny Tromp-Lee Bin celebra Dia di Betico hunto cu nos na Cede di MEP: Ban celebra nos identidad y honra e vision di nos Libertador.
