Un bon dia yen di sabiduria den nos alegria ! Spera cu boso tur ta gozando di e ultimo
actividadnan di nos Carnaval 72 cu nada mahos ! Mientras cu tur hende baylando “The lizard
song” y ta canta hunto kekekekeke, salud a permiti Lady Ruth bay varios bunita actividad riba
tereno social cultural. Diabierna nos a bay Djiespies Happy Hour y e biaha ki si nos a bayla un
balada romantico, anto canta den nos dushi idioma Papiamento. Nos no ta corda e nomber di e
banda musical di e anochi aki, por wel di ta algo cu dushi y vibes ofzo ? Enfin, nan tambe sa crea
dushi ambiente na Djiespies. Diasabra mainta nos a bay scucha e charla di e simpatico y
beautiful Jenny Andries di “Resigned by Jenn” den un di e salanan ariba di MFA Paradera Cas di
Mito. E tema tawata “Sea fuerte y balente” y nos tawata un grupo hopi motiva y a ricibi hopi
informacion educativo y informativo cu a inspira nos tur pa no keda pega den nos “comfort
zone” cu nos edad di 60 plus y mas, pasobra tin hopi cos bon y bunita cu nos por scoge pa hasi,
comparti y sigui goza di bida. Na final Lady Ruth a recita su bunita poema titula “Mini rok” y a
pone nan hari un crenchi. Nos a comparti nos mal experiencia di negligencia cu mi bunita mama
a pasa na hospital 3 luna y pico pasa. Ban wak si nos ta hanja un carta for di nan, mirando awor
cu tin problemanan entre IVA y HOH. Fastioso ora tin problemanan serio bomboshi andando
anto den lugarnan cu ta esencial pa cuido di pueblo y specialmente nos grandinan. Despues den
oranan di atardi e Diasabra aki, Lady Ruth a bay participa den un “Pop up workshop di traha
collage cu papel corta fei den revistanan varia cu tur sorto di tema ,tur color, tur sorti dibuho
grandi of chikito hinka nan den otro den un obra artistico na bo smak. E tawata un dushi atardi
na RAA Studio situa dilanti Botica Oduber den caya principal. E workshop aki a wordo duna pa
e gentil cabayero Patrick Mallison di United Kingdom, actualmente na Aruba. Un grupo hopi
motiva akinan tambe, cu bon atencion di Patrick y e dynamico Desiree Arends di RAA Studio.
Akinan tambe nos a recita un poema na final di e atardi, esaki ta titula “A friend” cu a bira The
friendship song cu letranan aserca di mi bon amigo Dr. Ike Posner y ayudo di AI. Cada bes nos
ta keda impacta di tur locual Inteligencia Artificial ta hasi riba asina hopi tereno . Su contestanan,
su consehonan. Ta wak mi a wak esaki riba un celular di un amiga, mi mes no ta usele ainda
pasobra mi no sa ta con y mi ta un crenchi huiverig cu mi ta delete cosnan cu mi no kier delete
ainda. Mi sa cu tin mas adultonan mayor cu tampoco no sa tur cos ainda ariba nan celular . No
tin nodi tene berguensa di esaki , cada ken cu nan mesun escogencia kiko nan ta desea di hasi
riba nan celular toch ? Danki lieve mensen, pa e bon comentarionan ricibi pa cu nos relatonan
semanal y pa sigui inspirami cu palabranan di curashi pa a confronta y enfrenta HOH nan
klachtencommissie den nomber di mas di nos grandinan den pueblo cu a y of ta pasando malo na
nan man. Tin hasta cu a bisami cu nan a scucha mi bon entrevista den e programa di Aldrich
Croes mainta, pone nan recorda mi dushi tempo na Radio Kelkboom cu “Dushi awasero
musical”. Ban goza di e “last lap” den nos dushi Carnaval weekend cu ta bin, na bon manera cu
respet pa bo mes y pa otro. Deseando tur nos carnavalistanan hopi alegria y gozo den e parada
grandi cu sigur lo ta bunita, grandi y luhoso atrobe. Ban spera cu lo tin steelpan den e parada !
Y…si bo ta bebe no stuur y si bo ta stuur no bebe ! Por fabor, evita peleanan innecesario pa falta
di orguyo of pa falta di respet, aleha, y bay bayla mas pariba of mas pabao. Y…corda pone bon
tino y atencion riba nos muchanan chikito . Bebe suficiente awa ! Pega pega song all the way cu
Lord Lallyyyyyyyyyyyyy!!!!! Carnaval carnaval, esta dushi ta carnaval !!!! Pabien Aruba !!!!!!
