Presidente di Comision di Finansas di Parlamento, Shailiny Tromp-Lee, a pidi un reunion formal den Parlamento pa cu directie di Departamento di Finansien bin duna clarificacion riba e posibel beneficio real pa Aruba si acaso pais acepta e propuesta di Rijkswet HOFA.
Segun Tromp-Lee, e reunion ta necesario pa duna Parlamento un splicacion detaya riba con e rebaho di interes menciona den e propuesta lo beneficia Aruba na realidad. Te ainda, segun nan, tin falta di claridad riba e contenido exacto di e propuesta.
E presidente di comision a mustra preocupacion cu e documento relaciona cu Rijkswet HOFA a wordo entrega na Rijksministerraad (RMR) na Hulanda sin aprobacion formal di Parlamento di Aruba ni sin un consenso amplio den pais. E situacion aki, a crea duda den Gobierno di Aruba y Hulanda tocante e proceso y e implicacionnan pa Aruba.
Tromp-Lee a indica cu varios cifra ta circula tocante e posibel rebaho di interes, pero hasta awor ningun di e informacion aki a wordo confirma oficialmente. Pa e motibo ey, e comision ta busca mas transparencia pa por evalua si e medida realmente lo beneficia Aruba y su pueblo.
Segun e presidente di Comision di Finansas, Parlamento mester haya informacion completo y concreto prome cu por tuma cualkier posicion riba e propuesta. Nan ta insisti cu e proceso mester inclui un discusion habri y un evaluacion profundo di tur implicacionnan financiero pa pais.
E reunion cu ta wordo pidi lo tin como meta principal pa pone Parlamento na altura di e situacion y pa aclara e posibel efecto di e rebaho di interes menciona den e propuesta di Rijkswet HOFA si realmente ta necesario y ta cumbini Pais Aruba