Locual nos tawata falta di relata di dushi Bonaire. Isla di dushi hendenan. Isla di flamingo. Isla di
amor ! Lady Ruth no por a keda sin comparti un algo mas di Bonaire su dushi hendenan !
Nos ta relata mas di nos bunita estadia na nos isla ruman Bonaire, di algun siman pasa. Despues
nos lo bin cu nos capitulo 2 di nos dushi Dia di hymno y bandera. Nos no ta slow, ta hopi tema
tin pa nos relata un crenchi di nan ainda. Nos falta di cubri algo di Dia di hende muhe e.o di
Empowerher cu a tuma lugar na Universidad di Aruba y actividadnan cu a tuma lugar na varios
lugar den e luna di Maart aki y tambe un crenchi di nos proyecto di tshirt cu poema riba dje,
patronica pa ATA Aruba Tourism Authority, nan dinamico team encabesa pa e simpatico y
bunita hende muhe profesional cu curason, sra. Ronella Croes cu e trabao fantastico di Marietje
Printing. Pues carga un crenchi pasenshi ! Ta temanan cu no ta muri pasobra tur anja tin dia
internacional di hende muhe y tur anja tin nos Dia Nacional, dia di hymno y bandera. Bon. Awor
: Ban Boneiro ban casa un bes ! Mientrastanto nos a skirbi y dedica poemanan bunita na tres
dama nechi elegante y bunita di nos isla ruman Boneiro : E artista multifacetico semper inspira
cu un curason profundo grandi pa su cultura Magalie Sumpter, cu su nomber artistico Magasu
Lady Bratz., na su kerido mama stima Oma Pipa Raimunda Martis, e curandero stima y mas
popular di Boneiro cu su poderoso oracionnan y na e bella y simpatico Shirley Martis di e
corantnan Extra Boneiro y e Boneriano. Y na un cabayero meymey di nan : “Ubaldo “Bubu”
Anthony” un gran escritor cu amor grandi pa su bario Tera Cora, relata den su buki titula :”Esaki
ta di mi “. Nan cumpleanos tawata tray otro. Lady Ruth a ricibi mas buki regalo, “ Shi Helena ta
conta” di e autor escritor Delno L.A.Tromp “Denchi” cu nos a ricibi di Magasu Lady Bratz,
Rosita Felicia Mamadu Makubeken, Mamu MaFlodder y Jesusito. Y di amiga colega Poeta
Regina “Uchi” Frans-Antonie su colleccion di poemanan titula “ Flor di Huku” for di cual Lady
Ruth a recita e poema MUHE riba dia internacional di hende muhe aki na Aruba cu a cay na
masha bon tera !. Danki lieve mensen tur pa tur e bunita bukinan cu asina bunita storia y poema
den nan ! Durante nos estadia di 4 dia na Boneiro nos a bishita tambe Biblioteca Publico di
Boneiro na Kralendijk den Caya Amsterdam, pa entrega di algun buki di poema di Lady Ruth y
tambe su ultimo buki pa mucha : Rene su dushi wega. E bukinan a wordo accepta pa Jessica De
Hooge y Blanca De Leon cu amabilidad y gradicimento, hopi contento pa buki na Papiamento
aunke un crenchi diferente cu e Papiamento skirbi di Boneiro. Nos a topa y hasi conosi cu Esther
y Maritza di CBS statistiek cu nan presentacion e merdia ey. Anochi nos a bishita un kampvuur
publico na Delphins Hotel riba beach, na unda tur hende ta bon bini y a goza di e fantastico
rapper Gerald Martinez di Boneiro y e cantante guitarista hulandes Jeroen cu ta bay bin riba e
isla. Un bunita anochi ! Un di e anochinan nos a come dushi na e truck Bonaire Grill cu su
tremendo chef donjo di e truck Michael Martijn cu dia 21 di juni e anja aki 2026 lo cumpli net 20
anja cu su Grill Truck, bandi stadion den playa. Michael : Bo ta master !! Pabien for di awor cu
bo logro asina grandi y bunita ! Pa su mayan den dia nos a bolbe keiro dushi asina cu mi amiga
Magalie y Johan mi casa a treat nos na Kite Truck Food canti un di e bunita beachnan natural
masha bunita mes. Tawata nos tres pasobra Ruthson “Yuyu” e casa di Magalie a bay Corsouw pa
algun dia. Nos bon amigo ruman Christian Mejia di Aruba a recomenda nos e dushi Kite Truck
Food ey maneha pa un portugues cabayero yama Andre hunto cu un sra. hulandes hopi carinoso,
cu hopi amor y aprecio pa nan di dos cas Boneiro. Nos a bishita tambe e oficina di e Fundacion
Historiko Kultural Boneriano FUHIKUBO den Kaya Irlanda 12, na unda su director Boi Antoine
a ricibi nos buki “Rene su dushi wega” y na unda Boi a regala Johan e buki di Kuifje na
Papiamento for di E aventuranan di Kuifje, e buki titula :”E asunto di Florisol”. Boi Antoin
escritor y periodista a soru pa e traduccion. Co de Koning tawata e tumado di e iniciativa y
propagado, y Jan Aarnout Boer a tuma e contactonan cu e editor Casterman. Un joya di un buki
! Ken no conose e serienan di Kuifje ? Tremendo ! Nos curason yen a bolter over cu nos aprecio,
amistad y amor pa nos dushi hendenan di Boneiro. Boneiru. Bonaire. Con cu bo kier skirbie, e ta
keda un fuente inspirador di un cultura cu no mag bay perdi nunca ! E cuna di hendenan
orguyoso tambe di ta indjan ! Cu Creador sigui drama su bendicion na abundancia di salud,
bienestar, alegria y sabiduria riba e dushi isla aki. Tur nos islanan di ABC ta bunita y bendiciona
! Danki pa lesa nos relato cu amor y atencion ! Un braza grandi diki gordo di Ruthy.
Pabien na FUHIKUBO cu nan tremendo trabaonan na bienestar di cultura y historia di
Boneiro.”YABI DI PASADO, PORTA PA FUTURO”
