Presidente di hunta di comisario di Banco Central di Aruba Ari Swaen, a duna detaye amplio tocante e trayectoria profesional cu a wordo sigui pa yega na e nombracion di Sr. Thomas Domhoff como e presidente nobo di Banco Central di Aruba (BCA). E proceso, cu a dura varios luna, a wordo diseña pa garantisa cu e candidato mas bisto y capacita lo asumi e liderasgo di nos institucion financiero mas halto.
Cronologia y Experticio Externo
E preparacionnan a cuminsa for di fin di aña 2024, ora a bira conoci cu e periodo di e anterior presidente lo a termina dia 1 di december. Pa Juni 2025, a dicidi formalmente pa habri un proceso di solicitud publico y den juli di e mesun aña, a contrata e firma hulandes.E compania, conoci pa su experiencia den recrutamento di directornan pa entidadnan na Aruba, a yuda stipula e perfil di funcion y e competencianan rekeri pa e puesto.
E vacante no a keda limita solamente na nivel local. A publica e yamada den corantnan di Aruba, Corsou, Boneiro, Islanan Arriba y Hulanda. Ademas, a uza plataformanan digital manera LinkedIn y e propio portal di Banco Central pa atrae e miho talentonan.
Te cu e fecha limite di 7 di september 2025, un total di ocho candidato a presenta nan solicitud:
- Aruba: 6 candidato.
- Sint Maarten: 1 candidato.
- Corsou: 1 candidato (Sr. Domhoff).
Pa e evaluacion final, a uza un “score formulier” cu criterionan concreto y a somete e candidatonan na un proceso di screening riguroso. Despues di e analisis profundo aki, a conclui cu Sr. Thomas Domhoff tabata e candidato mas fuerte y apto pa e posicion.
Minister Wever a enfatisa e importancia di e independencia di Banco Central y a gradici e Hunta di Comisario, bao guia di Sr. Ari Swaen, Sr. Li Wong y Sr. Gerardo Oduber, pa nan trabou ehemplar den e proceso aki. Cu e nombracion aki, Aruba ta sigura un transicion profesional cu tin como meta principal e proteccion di e stabilidad economico y financiero di nos pais, Segun Mnister di finansas y economia Geoffrey Wever.