Un situacion alarmante di deterioro structural ta afectando seriamente un departamento di gobierno, unda trahadonan a kibra e silencio pa denuncia loke nan ta considera condicionnan inhumano. Loke mester ta un ambiente profesional, a bira un peliger pa salud y un golpi pa e animo di e personal. Ta trata aki di edificio di cuerpo policial , specificamente e edificio di departamento di Rijbewijs, Asina presidente di sindicato SPA a indica
Peliger pa Salud y Siguridad
E detayenan cu a sali na luz ta pinta un cuadro preocupante di e edificio. No ta trata solamente di falta di mantencion basico, sino di problemanan structural grave cu ta pone e bienestar di e trahadonan na riesgo:
- Presencia di Schemel: E personal a confirma presencia di (schimmel) den e luga, un situacion cu ta afecta e calidad di aire directamente.
- Deterioro di Dak y Plafon: E dak ta den un estado asina malo cu e blafon ta biniendo abou, mientras cu e sistemanan di airco no ta funciona debidamente, creando un ambiente sofocante.
- Falta di Higiena: E luga ta wordo describi como un sitio sushi, unda e falta di un limpieza y mantencion profundo ta bisto pa tur cu drenta unda cu e murayanan ta pela y e holo amargo cu tin den e edificio.
E trahadonan a categorisa e situacion aki como “demasiado” y “totalmente inaceptabel” pa cualke ser humano fungi aden.
Un Keho Directo: “E Luga ta Kibra nos Animo”
Pa e personal, e situacion aki tin un costo emocional halto. Maske nan tin un gran amor pa nan trabou y kier sigui sirbi comunidad cu profesionalismo, e condicionnan fisico di e luga ta kibrando nan motivacion.
“Nan kier sigui traha cu amor cu nan tin pa nan trabou, pero e luga mes ta kibrando e animo y e forma di traha, E sentimento di cansancio a yega su punto final; e personal no tin espacio mas pa scucha promesa bashi cu no ta wordo cumpli.
Urgencia: Solucion “ASAP”
E keho aki ta sirbi como un alerta maximo pa e Minister encarga y pa e instancianan di gobierno, pero e alto mando cu tambe mester percura pa maneho di KPA. Despues di a duna hopi oportunidad pa drecha e situacion, e personal ta exigi un contesta y un solucion “ASAP” (mas pronto posibel).
E realidad ta cu e situacion ta birando pio dia pa dia, y e trahadonan no ta dispuesto pa sigui sacrifica nan salud den un edificio cu ya no ta adecua pa fungi como un oficina gubernamental. Comunidad y e personal mes ta keda pendiente pa un accion concreto cu ta pone fin na e crisis di infrastructura aki.
