Den marco di e conmemoracion di e di Dos Guera Mundial, lider di fraccion di PPA, Eduard Pieters, a resalta cu e legado di e heroe Arubiano Boy Ecury ta bay mas leu cu un recordatorio historico; e ta un les di bida y un ehempel pa e politica actual na Aruba.
Durante e ceremonia solemne unda Arubahuis y studiantenan Arubiano a rindi homenahe na Ecury, parlamentario Pieters a comparti un reflexion profundo riba kico e sacrificio di e hoben luchado di resistencia ta nifica pa e lidernan di awe.
“Drenta den ring” Pieters a haci un comparacion directo entre e curashi di Boy Ecury y e bida politico na Aruba. “Hopi biaha den politica ta mas facil pa para na banda y critica, pero ta mucho mas duro pa tuma decision, ‘drenta den ring’ y purba cambia un direccion negativo pa uno positivo,” Pieters a declara. Segun e parlamentario, Ecury a demostra cu ora un situacion no ta corecto, bo mester tin e balentia di actua pa trece cambio pa bienestar di e ser humano y e patria.
Un enseñansa pa futuro generacion Pa e lider di PPA, e sacrificio di Ecury no ta solamente un acto di heroísmo den tempo di guera, sino un guia moral pa e futuro generacionnan. El a enfatisa cu bida no ta semper “color de rosa” y cu progreso ta rekeri decisionnan firme y sacrificio personal.
“Esaki ta e enseñansa cu señor Ecury a laga: e escogencia pa haci un cambio pa miho pa nos futuro generacion. E ta un ehempel di sacrificio no solamente pa pueblo di Aruba, sino pa henter Reino Hulandes,” Pieters a agrega, subrayando e importancia pa e hobenan presente compronde cu nan tambe tin e responsabilidad di hiba e pais padilanti a traves di nan decisionnan.
