Aruba falta informacion riba HOFA
Motibo principal: Gobierno AVP-FUTURO a negosha den silencio cu Hulanda y a manda un concepto pa Rijksministerraad aproba SIN informa Parlamento, ni Pueblo prome. Esaki ta crea preocupacion legitimo, pasobra un tema cu tin impacto constitucional y financiero grandi no mester wordo maneha den un “onderonsje” fo’i bista di Pueblo.
Te ainda awe:
E Prome Minister Mike Eman ta ausente den e debate publico. E no ta bin Parlamento pa splica ni defende HOFA, y tampoco e no ta informa pueblo via cadena nacional.
Aruba tin un Minister di Relacion den Reino, Gerlien Croes cu nunca a haci un programa informativo, conferencia di prensa of duna un splicacion cla riba kico HOFA realmente ta implica.
E Minister Wever di Finansa ta enfoca casi exclusivamente riba e aspecto financiero, mientras cu e parti constitucional di HOFA por ta ainda mas importante pa futuro di nos Status Aparte y autonomia.
Cobardia político
Loke ta preocupa hopi hende ainda mas, ta cu actualmente tin presion politico pa limita oposicion den comparti informacion cu gremionan y pueblo. Asina nos por a mira con Minister Wever di Finansa a exigi pa representanan di Pueblo wordo saca for di sala di encuentro informativo. Un acto lamentabel y di cobardia, ya cu transparencia no por wordo mira como un menasa den un democracia.
Y pa completa e preocupacion
E Secretario di Estado Hulandes encarga cu Relacionnan den Reino, Van der Burg, ta mustra cu no e no ta suficiente informa riba e posicion unico di Aruba den Reino Hulandes. Su discurso ta divulga un movecion den e direccion di trata tur e 3 paisnan Aruba, Corsou y Sint Maarten na manera igual, sin reconoce cu cada pais tin su propio historia, propio acuerdo constitucional y propio mandato democratico.
E pregunta crucial ta: HOFA ta solamente un instrumento financiero? Of ta un paso grandi den cambio di relacion constitucional den Reino Hulandes?
Ban lanta contra abuso
Pueblo di Aruba merece informacion completo, debate habri y transparencia total prome cu decisionnan asina importante wordo tuma. Pueblo mester lanta ariba y NO acepta e abuso di Eman, Gerlien y Geoffrey pa entrega Aruba su autonomia den un “onderonsje” den cual Pueblo ta keda mal informa.