Minister Sra. Drs. Melvin Wyatt-Ras a participa den e lansamento oficial di e Proyecto di Cuido Multidisciplinario pa Diabetes na Aruba, un iniciativa cu ta fortalece e cooperacion entre diferente profesionalnan di salud pa brinda cuido mas coordina, accesibel y personalisa na personanan cu diabetes tipo 2.
Durante su discurso, Minister Wyatt-Ras a enfatisa cu diabetes ta un reto importante pa salud publico na Aruba. El a indica cu bon cuido di diabetes ta bay mas leu cu tratamento solamente y cu prevencion, guia y continuidad ta esencial pa logra miho resultadonan pa e pashent.
E proyecto piloto ta resultado di cooperacion entre Directie Volksgezondheid (DVG), IMSAN, AZV, Dr. Horacio Oduber Hospitaal (HOH), dokternan di cas y diferente profesionalnan di salud. E meta di e iniciativa ta mehora coordinacion entre diferente disciplina den cuido di salud pa brinda apoyo mas efectivo, mas personalisa y mas cercano na e pashent.
Na Aruba, aproximadamente 11% di poblacion ta biba cu diabetes. Cu e modelo di cuido multidisciplinario aki, pashentnan lo beneficia di guia, apoyo y continuidad den cuido door di un ekipo cu ta inclui internista, verpleegkundige di diabetes, dietista, trahado social, pedicurista specialisa den cuido diabetico y otro profesionalnan relevante.
E programa piloto lo dura un aña. Durante e periodo aki, diferente profesionalnan di salud lo traha hunto pa monitorea e progreso di e pashentnan y yuda nan logra un miho control di nan condicion, cu e meta pa preveni complicacionnan den futuro.
Durante e ceremonia, diferente representante di e partnernan envolvi a comparti informacion tocante e proyecto y su importancia pa salud publico. Sra. Esther Vermeulen di DVG a presenta e proyecto y su metanan principal. Seguidamente, dr. Karina Kelly, internista na HOH, a comparti su perspectiva specialista riba cuido di diabetes y e balor di un modelo multidisciplinario den tratamento di e condicion. Dr. Monica Nuboer, Interim Medisch Directeur di IMSAN, a destaca e rol di IMSAN den ehecucion di e proyecto piloto. Sra. Judelca Briceño di DVG a enfoca riba e importancia di traha hunto pa logra miho resultadonan pa e pashentnan. E ceremonia a conclui cu palabra di Minister Sra. Drs. Melvin Wyatt-Ras.
E programa piloto ta destina pa un grupo specifico di personanan cu diabetes tipo 2. Personanan entre 18 y 69 aña cu un nivel di HbA1c riba 53 y un BMI riba 25 por consulta cu nan dokter di cas of POH (Praktijkondersteuner Huisartsenzorg) pa determina si nan ta cualifica pa participa.
Minister Wyatt-Ras a expresa su gradicimento na tur partnernan cu a contribui na realisacion di e iniciativa aki, incluyendo DVG, IMSAN, HOH, AZV, dokternan di cas, profesionalnan di salud, TWO Aruba y TWO Hulanda.
E iniciativa aki a wordo desaroya y implementa danki na un cooperacion estrecho entre e diferente partnernan envolvi, cu apoyo di Tijdelijke Werkorganisatie (TWO) Hulanda.
Cu e lansamento aki, Aruba ta tuma un paso importante den direccion di un sistema di salud mas integra, unda e pashent ta central y cuido multidisciplinario ta contribui na miho bienestar pa nos comunidad.
