Tourism Corporation Bonaire (TCB) a duna rekonosementu na kuater bishitante prosedente di Merka komo embahador di Boneiru den kategoria di oro.
Nan ta wéspetnan ku ta bishitá Boneiru riba un base regular, sigur dos pa tres bes den un aña. Nan ta manera nos ta bisa ‘repeat ambassadors’, o sea embahadornan ku ta keda bini bèk.
Dos di e embahadornan akí di luna di mei 2026 ta Mike Smith i Peggy Mongrue. “Pa nos kada bes ku nos tin ku skohe un destinashon pa fakansi, e opshon semper ta kai riba e dushi isla di Boneiru. Esaki debí na bunitesa di e isla, su habitantenan i prinsipalmente tur e sitionan pa sambuyá ku e isla akí ta ofresé,” asina e pareha a informá.
E otro dos embahadornan ta Ed Finck i Donna Donlin ku tambe ta bishita Boneiru regularmente. “E aña akí tampoko nos no tabatin ningun motibu pa keda sin bishitá Boneiru. Kada bes di nobo e isla akí tin nos preferensia. Nos ta enkantá ku e hendenan amabel ku ta biba akinan, i sin laga afó e mundu marino. Boneiru ta eksepshonal!,” segun e pareha akí a trese dilanti.
Tantu Mike, Peggy, Ed i Donna ta bishitando Boneiru pa 20 aña kaba. Tur kuater embahador a risibí nan feneta di oro i nan sertifikado serka Helen Mercera.
