Ponemento di e containernan den bario no ta solucion sostenibel ni duradero. Aruba mester un vision pa maneho di desperdicio.”
Mientras Gobierno ta celebra e ponemento di e containernan pa recohe desperdicio, parlamentario Eduard Pieters di Partido Patriotico di Aruba (PPA) ta bisa cu Aruba no por sigui confundi alivio temporal cu solucion permanente.
Durante su entrevista na Enfoke 90, Pieters a laga cla cu PPA no ta contra e iniciativa pa pone mas container den bario. Al contrario, segun Pieters, cualkier esfuerso cu ta facilita e ciudadano pa por benta desperdicio corectamente, merece reconocemento. Pero, segun e parlamentario, e pregunta cu Gobierno no ta contestando ta otro.
Kico ta pasa despues cu e containernan yena?
“Nos ta trata e sintomanan,” Pieters a bisa. “Pero nos no ta trata e causa di e problema.”
Segun Pieters, Aruba ta enfrenta un crisis di desperdicio cu no a cuminsa awe. Pa mas di un decada, diferente gobierno a reacciona riba e problema cu e solucionnan temporal, mientras e cantidad di desperdicio ta sigui crece.
E parlamentario a recorda cu desde 2018, bou di liderazgo di Otmar Oduber como Minister di Infrastructura, a propone introduccion di e incineradornan moderno como parti di un plan mas amplio pa reduci e dependencia di landfill. Segun Pieters, e propuesta ey tabata fuertemente critica pa oposicion y finalmente no a sigui cu ne. Ironicamente, awe Gobierno ta recuri na e mesun tecnologia pa trata medical waste y sludge. “Esey ta mustra cu e idea no tabata malo. Loke a falta tabata boluntad y curashi politico.” Segun Pieters, e problema cu Aruba tin actualmente no por ta resolvi solamente cu mas baki of mas container. “E desperdicio no ta desaparece. E ta djis cambia di lugar.”
Mester un strategia nacional
E parlamentario a señala cu despues di cera Parkietenbos, Aruba a habri Ser’i Teishi como solucion temporal. Sinembargo, ocho aña despues, e “temporal” a bira permanente, mientras e comunidadnan manera; Simeon Antonio y Cas Paloma ta sigui enfrenta consecuencia ambiental.
Pa Pieters, Aruba mester un strategia nacional cu ta bay hopi mas leu cu simpelmente recoge desperdicio. Segun Pieters, e pais mester inverti den reduccion di desperdicio, reciclahe, separacion na fuente, educacion ambiental y tecnologia moderno cu minimalisa e cantidad cu finalmente ta termina den landfill.
Cooperacion regional pa un sistema mas eficiente
E parlamentario tambe a propone cu Aruba mester explora cooperacion regional pa crea un sistema mas eficiente di incenerador waste-to-energy, aprobechando mayor volumen di desperdicio hunto cu e otro islanan. Sinembargo mester sondea e posibilidad pa transporta sushi riba lama cu segun expertonan no ta permitibel. “No tin un solucion milagroso,” el a bisa. “Pero tin solucionnan sostenibel si y nos tin e vision pa pensa dies of binti aña mas dilanti.”
Pa Pieters, e debate actual no mester limita su mes na un contrato of un proveedor. E berdadero debate ta, si Aruba finalmente lo dicidi pa cambia di un maneho reactivo pa un politica nacional, cu realmente lo ataca e rais di e problema. “Nos no por sigui pone container tras container, mientras e sero di desperdicio ta sigui crece tur parti na Aruba cu tin un buraco.” Segun PPA, Aruba no tin falta di iniciativa. Tin falta di un vision nacional pa maneho di desperdicio y stop cu solucion temporal, ya cu nan lo djis crea mas reto y problema p’e futuro generacion.