Universidad di Aruba (UA) a celebra un momento special cu su 15 Ceremonia Anual di Student Ambassador Awards, unda a honra studiantenan cu ta demostra cu logro ta trata di mas cu solamente bon cifra. E ta trata di liderazgo, servicio, caracter, conexion y e impacto positivo cu un persona ta haci riba otro.
Bou di e tema “A Legacy of 15 Years”, Universidad a celebra un grupo di studiantenan cu ta representa e energia di un UAchiever: studiantenan cu ta mustra compromiso, ta yuda y motiva otro, ta contribui na UA y na comunidad Arubano, y ta yuda crea un experiencia universitario mas fuerte pa esnan rond di nan.
E Student Ambassador Award ta reconoce studiantenan cu ta activamente envolvi den
Universidad y/of comunidad Arubano, cu ta dispuesto pa haci un esfuerso extra pa
yuda otro, ta demonstra un actitud amabel y ta participa den actividadnan di UA of di nan programa, y tin bon habilidadnan social y di comunicacion.
E recipientenan di e Student Ambassador Award 2025–2026 tabata:
*Academic Foundation Year – Dayna Albertus, reconoci pa saca maximo provecho di e oportunidadnan durante su trayectoria den AFY, incluyendo e logro di completa 77 credit, internship, experiencia den investigacion, workshopnan di Shoco Wellness, entrenamentonan externo y e AFY Bridge Builder Award.
*Office of International Affairs – Sabrine Setrodjemino, reconoci pa su habilidadnan organizativo, compromiso y apoyo na e oficina di OIA, mientras cu el a demonstra un determinacion extraordinario y a completa su estudio di bachelor y sigui su estudio di master.
*Bachelor of Arts in Organization, Governance and Management (OGM) – Dieter Croes resalta! Pero ta menciona cu hunto cu su fellow studiantenan Roan, Brandon y Ronan, reconoci pa nan contribucion colectivo na e actividadnan di OGM y pa inspira y informa otro studiantenan actual y futuro di OGM.
*Bachelor of Science in Sustainable Engineering (SISSTEM )– Stephen Richards, reconoci pa su actitud cortes, su apoyo na su teamnan Kiran y Josianne, su disposición pa comparti conocimiento mediante e Makerspace Bus y su participación den e proyecto Turning the Tide, cu ta conecta UA cu e comunidad local.
*Bachelor of Arts in Social Work and Development (SWD )– Cendeline Boekhoudt, reconoci pa su compromiso cu su estudio y programa, su participacion den Open House, actividadnan di acreditacion y evento di estudiantenan, su contribucion na e banda musical di UA y su disposicion pa yuda fellow studiantenan.
*Library/Bookstore – Derron de Mey, reconoci pa su pasenshi y dedicacion pa yuda studiantenan nobo orienta cu buki, procedura y requisito di universidad, como tambe pa su disposicion pa duna un man ora cu mester di apoyo.
*Bachelor’s Degree in Aruban Law– Damon Illes, reconoci pa su apoyo constante na fellow studiantenan, personal academico y Universidad, incluyendo su asistencia cu actividadnan manera Open House.
*Master’s degree in Law – Lianne Candelaria, reconoci pa su fuerte envolvimento academico, su apoyo na fellow studiantenan, su participacion activo den e Faculty of Law y su compromiso pa promove UA tanto internamente como externamente.
*Bachelor’s degree in Hospitality, and Tourism Management Studies( FHTMS) – Jurstin Paesch, reconoci pa su compromiso cu su metanan como studiante, empleado y miembro di e comunidad local, y pa e manera cu e la habra su horizonte mediante oportunidadnan internacional den salud global, emprendemento sostenible y liderazgo.
*Financieel Economishe Faculteit (FEF) – Lucirene Tromp, reconoci pa su presencia energetico y social, su apoyo na representante di studiantenan, su contacto cu studiantenan y su contribucion na evento y medio social di UA y FEF.
*Office of Student Affairs ( Social Media Team) – Keon Dania, reconoci pa tres aña di dedicacion, creatividad y contribucion na e imagen visual y esfuerzonan di marketing di UA, creciendo pa bira un parti importante di e team creativo di Universidad.
Durante e ceremonia, e UA Music Club tambe a wordo reconoci como Student Club of the Year 2025–2026. Loke a cuminsa como un club di studiante a crece bira un banda cu ta contribui na celebracionnan di Pasco, Open House y otro actividadnan di universidad. E club ta demonstra con studiantenan por crea, inspira y trese hende hunto.
E anochi tambe a conta cu un contribucion significativo di Setar N.V., cu a presenta 10.000 florin na Student Development Fund, cu ta brinda apoyo na studiantenan di
UA cu ta studia full-time y cu ta busca oportunidadnan academico y profesional, manera participacion den conferencia, intercambio, internshipnan den exterior y
emprendemento social.
UA ta expresa su sincero gradicimento na su sponsornan — Setar N.V., Giannis Group, Glorias, Royal Aruba Aloe, Subway Aruba y Wow Cosmetics — cu nan generosidad y confiansa den e potencial di nos studiantenan a yuda haci e celebracion aki posibel.
Un di e momentonan mas inspirador di e anochi tabata e participacion di Dr. Chun,
kende su trayectoria personal ta representa e spirito di un UAchiever. E la cuminsa su trayectoria na UA como studiante y como e prome Student Affairs student assistant di Universidad. Awe, el ta ocupa e posicion di Dean di e Faculty of Law. Su historia ta un recordatorio poderoso cu e punto unda un studiante ta cuminsa no ta determina unda e por yega. Oportunidadnan, perseverancia, inspiracion y impacto por forma un trayectoria extraordinario.
E celebracion aki ta refleha e vision mas amplio di Universidad pa ta localmente y globalmente envolvi; preparando studiantenan no solamente pa nan carrera, sino
tambe pa bira ciudadanonan critico y activamente envolvi cu ta contribui di forma significativo na Aruba y na mundo.
E Strategic Plan di UA ta pone enfasis riba transforma bida, fortalece comunidadnan y cultiva generacionnan cu ta contribui di manera significativo na Aruba.
E esencia di e Student Ambassador Awards ta un celebracion di e conviccion di Universidad cu studiantenan no ta solamente recipientenan di educacion; nan ta parti di loke ta haci Universidad di Aruba loke e ta awe.
Pa medio di nan liderazgo, ideanan, servicio, creatividad y disposicion pa yuda otro, e studiantenan aki ta yuda construi e comunidad di UA awe, mientras cu nan ta contribui na forma e Aruba di mañan.
Universidad di Aruba ta felicita tur su Student Ambassadors y UAchievers. Nos ta mira bo. Nos ta balora bo. Nos ta orguyoso di bo , y nos ta mira cu entusiasmo pa e impacto cu bo lo sigui haci na UA, na Aruba y mas aya.
