Ex-minister ta cuestiona prohibicion general riba UTV y ATV: “ROPV ta duna Gobierno instrumento pa regula y proteha; e no ta libera Gobierno di su responsabilidad pa gobierna”
Si Gobierno ta bisa cu ley ta oblig’e pa sera acceso na Noordkust, mustra e ley, mustra e articulo y splica pueblo exactamente kico e ta prohibi. Cu e reto ey, ex lider di PPA y ex-minister di Infrastructura y Medio Ambiente, Otmar Oduber, ta drenta frontalmente den controversia relaciona cu e problematica cu UTV, ATV, tour operatornan y proteccion di Noordkust.
Oduber su posicion ta cla: naturaleza mester ta proteha. Pero proteccion no ta nifica cu Gobierno por laga di goberna y simplemente prohibi un actividad completo.
“Si tin un ley cu ta bisa esaki, cua e ta? Mustra mi,” Otmar Oduber a vocifera durante un conferencia di prensa.
ROPV ta pa regula, no pa sconde tras di dje
Oduber conoce e proceso di ordenamento teritorial for di cerca. Durante su periodo como minister, su cartera a traha cu instrumento di planificacion, proteccion di area natural y introduccion di aanlegvergunning. E ROPV 2021 efectivamente estableci den Articulo 5, un sistema di aanlegvergunning pa e actividadnan cu por cambia tereno of afecta balor natural, ecologico, arkeologico of geologico. E articulo tambe ta duna minister facultad pa pone condicion pa proteha e balornan ey. Pero Oduber su argumento ta, cu Gobierno mester aplica e cuadro cu precision. Segun Oduber, no por simplemente uza “ROPV” como palabra final y prohibi un sector complete, sin splica cua destino, cua articulo y cua regla ta aplica.
Articulo 10: Gobierno por proteha area
Oduber a referi specificamente na Articulo 10 di Natuurbeschermingsverordening, cu ta forma e base pa diseña un area como natuurreservaat. E punto di Oduber ta, cu e instrumentonan pa proteha naturaleza t’ey. Y el a recorda tambe, cu tempo cu tabatin eherce e funcion como minister, el a impulsa proteccion di diferente area natural, Marine Park y otro medida ambiental.
P’esey e no ta acepta cu ta reduci e debate na: “bo ta pro UTV of bo ta pro naturaleza.”
Pa Oduber, esey ta un escogencia falso.
“Pone GPS. Pone ruta. Controla. Y sanciona.”
Oduber a pone un alternativa concreto riba mesa. E tour operatornan serio ya ta traha cu GPS. Gobierno por determina ruta autorisa y conecta control cu DNM of otro instancia competente pa vigila y controla e uzo, paso esey falta. Si un UTV of buggy sali for di ruta, ta sanciona e operador. Si nan ta sigui haci, ta pone un sancion mas fuerte. E ‘handhaving’ mester tuma lugar.
Y si un operador repetidamente viola e condicionnan, Oduber ta considera cu Gobierno mester por aplica e consecuencia cu e ta perde su licencia di operacion.
Esaki tampoco ta un idea nobo di Oduber. Ya como minister na 2019 el tabata papia publicamente di un sistema di retira of revoca licencia pa ATV/UTV, si operador no cumpli.
No laga un demanda hudicial goberna Aruba
Oduber su critica mas politico ta contra loke e ta considera falta di decision di Gobierno.
E echo cu un organizacion of persona por bay Corte, no ta nifica cu Gobierno mester paralisa su propio autoridad. Actualmente tin un proceso hudicial relaciona cu proteccion di Noordkust y UTV/ATV.
Pero segun Oduber, si Gobierno ta convenci cu su politica ta corecto, pone e condicionnan, motiva nan huridicamente y defend’e dilanti hues. “Un hende so no por tene un pais hostage.”
Gobierno mester proteha e barancanan, flora, fauna y area vulnerabel. Pero mester hacie mediante ley, zonificacion, ruta, permiso, control y reinforsamento.
No door di castiga automaticamente tur operador pa falta di control riba esunnan cu ta viola regla. “Proteha naturaleza. Pero goberna. Mustra e ley, pone e regla y haci tur posibel pa cumpli cu e regla,” Otmar Oduber a expresa na final.
