Ordenacion teritorial ta keda un di e pilarnan mas crucial pa e desaroyo sostenibel y e calidad di bida na Aruba. Den e contexto aki, Milton Ponson di Rainbow Warriors Foundation a expresa su preocupacion pa e decision di gobierno pa pospone e proceso di revision di e Plan di Desaroyo Territorial cu Reglanan (ROPv), un paso cu segun e organisacion ta desvia di e marco legal estableci.
Bao di e Ordenansa di Desaroyo Territorial (Landsverordening Ruimtelijke Ontwikkeling), e Plan di Desaroyo Territorial (ROP) a wordo fiha na aña 2019 pa un duracion di 10 aña, cual ta vence na 2029. E plan general aki ta duna e liñanan di guia pa determina con ta utilisa e teritorio nacional den cada area,sea pa construccion di vivienda, actividad comercial, turismo, industria of conservacion di naturalesa y zonanan di buffer.
E funcion di e ROPv y e rekisito legal di revision
Pa duna contenido detaya na e ROP, ta fiha e ROPv (Ruimtelijke Ontwikkelingsplan met Voorschriften). E plan aki, fiha na 2021 pa un periodo di 5 aña manera ley ta prescribi, ta basa riba datonan concreto di disponibilidad di tereno pa vivienda, turismo y centro comercial, y ta specifica area pa area kico ta permiti pa traha, no traha of conserva.
Segun e calendario legal, e proceso di revision di e ROPv mester a cuminsa na e aña aki, 2026. E ley ta prescribi cu e revision aki mester tuma luga despues di un amplio consulta cu tanto expertonan interno di gobierno como stakeholders y e comunidad, mirando cu e ordenacion teritorial ta afecta directamente sectornan clave manera vivienda y economia.
Preocupacion pa posponemento te cu 2029
Ponson a señala cu e decision di Gobierno di AVP-Futuro pa elimina e proceso di revision actual y prolonga e ROPv te cu aña 2029,pa haci’e coincidi cu e revision di e ROP general ta significa un desviacion di e mandato legal. Segun Rainbow Warriors Foundation, e decision aki ta stroba e oportunidad pa recalibra kico ta deseabel pa Aruba por haci den e diferente areanan di nos pais.
Entre e temanan mas urgente cu mester di atencion y regulacion den e ROPv ta e crecemento di e mercado di short-term vacation rentals (Airbnb). Actualmente, un cantidad considerabel di cas y compleho di apartamento ta wordo converti den alohamento turistico, reduciendo e disponibilidad di vivienda pa trahadonan local y famianan cu mester huur un cas. Segun Ponson, e falta di revision di e reglanan teritorial ta impedi cu ta tuma e medidanan necesario pa balansa e desaroyo turistico cu e necesidad di vivienda pa e poblacion local.
