Como e pionero di neuropsicologia na Aruba
Drs. Melva Croes-Yánez, via su clinica specialisa Ambulatorio di Neuropsicologia Aruba (ANA), a dedica mas di tres decada na brinda diagnosticonan neurocognitivo preciso, cientifico y culturalmente adapta pa e población di Aruba y su habitantenan multilingue. Durante entrevista e ta enfatisa cu un diagnostico neuropsicologico confiabel ta e pilar fundamental pa diferencia un deterioro cognitivo leve di trastornonan mayor (manera un Trastorno Neurocognitivo manera Alzheimer), asegurando asina un intervencion medico digno y oportuno.
Na aña 1990, e a regresa Aruba despues di a gradua na Hulanda y a solicita trabou. Na e momento ey nan a bis’e cu e tabata sobrecualifica pa Aruba. E no a sinta man crusa y a cuminsa su propio clinica, Ambulatorio de Neuropsicologia Aruba (ANA), ya caba 35 aña pasa. Na Hulanda y como un Arubiano perseverante, e mes a paga su estudionan, mirando cu e tempo ey no por a haya un beca di Aruba; esakinan tabata destina pa cierto categoria di hende, y e no a califica pa un (a bis’e e momento ey cu esey tabata pasobra su tata tabata un obrero). Na Hulanda nan a trat’e como un estranhero y tampoco tabata facil, pero trahando den trabounan domestico na oficina di impuesto na Eindhoven via un empresa di trabou temporal (uitzendbureau) den añochi, y asistiendo na universidad durante dia, e la logra toch obtene su titulo di doctorado/maestria den e tempo stipula.
Durante e 2 añanan di doctorado den Neuropsicologia, un di su tareanan tabata consisti, entre otro, den traduci y adapta e baterianan di prueba pa pashentnan di accidente cerebrovascular y condicionnan neurocognitivo pa e idioma Papiamento y e cultura di Aruba. Ademas di esaki, e baterianan / ekipo di prueba (Ingles, Hulandes, Spañó) ta amplio, adaptabel na diferente condicion neurogico, idioma, cultura y semper original (no copia!). Durante su carera, Drs. Yánez a haci hopi evaluacion neuropsicologico den un diversidad di afeccion y patologia, tanto cerca mucha como cerca adulto (incluyendo adultonan mayor), cu e intervision di Profesor Van der Vlugt y su departamento universitario; “Tilburgs Ambulatorium voor Neuropsychologie” (TAN). E cooperacion aki entre TAN y A.N.A. a dura 22 aña mas, te na fayecimento di Profesor Van der Vlugt (Q.E.P.D.) na aña 2016. E aliansa aki tabata clave pa e desaroyo di neuropsicologia como profesion na Aruba. E echo cu e profesor tabata biaha dos te tres bes pa aña pa Aruba, conhuntamente tabata organisa tayer y curso pa, entre otro, dokternan di cas, trahado social, maetronan di scol na Aruba y Curaçao y tambe ta participa conhuntamente na congresonan y cursonan internacional y local di alto nivel (entre otro na Hulanda, Estados Unidos, Canada, Mexico, Hawaii), ta demustra e gran compromiso cu semper tabatin pa trece e conocemento cientifico mas avansa y adapt’e na e realidad local.
Kico ta Neuropsicologia?
En corto: Neuropsicologia ta un rama di neurociencia specialisa, cu ta combina psicologia y neurologia. E ta studia con e structura y e funcionamento di e celebro ta influi riba nos conducta, emocionnan y capasidadnan cognitivo. E neuropsicologo no ta examina e celebro fisicamente (hardware; manera un resonancia magnetico), sino cu e ta evalua con e celebro ta funciona (software) den e bida diario. Esaki ta wordo haci via pruebanan specialisa, valido y confiabel pa midi aspectonan cerebral manera:
*Memoria y atencion.
* Idioma y comunicacion (verbal y no-verbal).
*Habilidadnan di resolucion di problema y planificacion.
*Cambionan di personalidad o conducta despues di un lesion cerebral o condicionnan degenerativo di e celebro.
E programa di grado (‘degree’) den neuropsicologia
E plan di estudio pa obtene e doctorado na aña 1990 den Neuropsicologia tabata consisti di:
*Neuroanatomia y Neurofisiologia: Conocemento medico intermedio riba e structura y e funcionamento di e celebro humano y e principionan basico di “Neuroimagen”: e Electroencefalograma (un prueba medico cu ta registra e actividad electriko di e celebro), y e teknicanan di scan cerebral cu ta permiti evalua e anatomia (structural) of e metabolismo y e actividad celular (funcional) (ehempelnan: MRI, fMRI, PET, CT, EEG).
*Diagnostico Neuropsicologico: Teoria y practica riba con y ki ora mester maneha e bateria di pruebanan. Su obhetivo principal no ta solamente pa detecta daño organico, sino pa traha e perfil funcional di e pacient pa identifica tanto su deficitnan como su habilidadnan preserva.
*Neuropsicologia Clinica / Neuropatologia: Estudio di enfermedad y lesionnan cerebral specifico (por ehempel: afasia, amnesia, trastornonan neurocognitivo—antes nomina como demencia—y e consecuencianan di un ataque vascular di e cerebro (CVA) of trauma.
*Psicofarmacologia: Estudio di e funcionamento y e efectonan di e medicamentonan y substancianan kimico riba e sistema nervioso central y e comportacion.
*Estadistica avansa y Aplicacionnan Informatico: Metodologia profundo orienta na e investigacion experimental y clinico-neuropsicologico exhaustivo via pruebanan standarisa, entrevista y revision di e historia medico.
*Diagnostico diferencial: Capacitacion pa determina si un problema cognitivo di, entre otro, memoria, etc., ta debi na por ehempel un proceso neurodegenerativo No-reversible of un condicion reversible (ehempel: un factor psicologico, manera depresion of stress severo).
Pakico neuropsicologia ta di sumo importancia den e cadena di atencion neurologico?
Neuropsicologia ta hunga un papel indispensable hunto cu por ehempel pediatranan, neurologonan y otro specialistanan pa e siguiente rasonnan principal:
*Diagnostico preciso di trastornonan neurocognitivo mayor y/of leve: Esaki ta fundamental pa detecta e enfermedad/condicionnan ya menciona, ora cu e prome cambionan cognitivo of di comportacion cuminsa manifesta su mes, mientras cu e celebro structuralmente por parce normal ainda riba un scan.
*Evaluacion despues di un CVA of trauma cerebral: Ora un persona sufri un CVA (stroke) of un golpi fuerte na cabes (traumatismo), e neuropsicologo ta mapa exactamente kico a keda afecta y kico a keda intacto.
*Tratamento y rehabilitacion personalisa: Conociendo e puntonan fuerte y debil di e pashent, por elabora un plan di rehabilitacion cognitivo especifico pa e persona siña maneha y recupera e grado di autonomia mas halto posibel. Despues di un screening / prueba inicial, no ta un opcion pa e medico declara “cu nada mas por wordo haci” y cu mester cuminsa prepara pa drenta un cas di anciano of bishita notario, bay un centro di dia pa hende grandi, etc. Mester comprende cu no semper un score abou di un evaluacion inicial (screening) ta nifica cu tin Alzheimer of “Demencia”. Y di otro banda, un score perfecto no necesariamente kier men cu no tin nada. E evaluacion ta djis un indicacion cu e condicion merece atencion y mester wordo investiga mas a fondo. E evaluacion inicial (screening) No ta sirbi como un diagnosis!
*E diferencia entre un psicologo y un neuropsicologo
Na prome bista, un neuropsicologo ta un psicologo, pero no tur psicologo ta neuropsicologo. E diferencia ta sinta den e contenido di e campo di estudio. Un neuropsicologo ta un psicologo specialisa cu ta domina e relacion compleho entre e celebro fisico y e comportacion, enfocando riba con e salud cerebral ta afecta e pensamento, e estado di animo y e funcionamento diario. Un neuropsicologo tin un titulo di doctorado den psicologia (sea Ph.D., Psy.D., of Drs.) cu un formacion avansa y specialisa den relacionnan celebro-conducta y evaluacion clinica.
Diferencia entre un Neuropsicologo y Psicologo Clinico
Diferencia entre un Neuropsicologo y Psicologo Clinico
Diferencianan clave entre un Screening (Prueba cognitiva inicial/superficial) y un Evaluacion Neuropsicologico
Un prueba cognitivo inicial / superficial (un Screening) ta wordo usa pa detecta posibel problemanan di memoria of pensamento, mientras cu un Evaluacion Neuropsicologico ta un examen profundo di varios ora cu ta analiza detayadamente con e celebro ta funciona. Maske e dosnan aki ta evalua capasidadnan mental manera atencion, nan ta cambia completamente den nan obhetivo, duracion y e specialista cu ta realiza nan.
*E Cuestionarionan corto (screening) manera e prueba di MoCA of e MMSE ta pa evalua: entre otro, orientacion, idioma y e memoria a corto plaso.
*Ki ora ta us’e: Den consulta cu medico di rutina (doctor di cas) ta dicidi si e pashent mester wordo referi na un specialista (Neurologo). Esaki ta hopi importante como e prome paso den e trayecto.
*Limitacionnan: Como cu e ta asina breve, por pasa cu tin un score halto problemanan leve cerca personanan cu un nivel educativo halto. E No ta sirbi como un diagnosis!
Evaluacion Neuropsicologico:
*Esaki ta consisti di: Un bateria di pruebanan standarisa cu ta midi e coeficiente intelectual, e funcionnan ehecutivo, e memoria avansa, e motricidad fini y e estado emocional. E resultadonan ta wordo compara cu datonan di personanan di e mesun edad y nivel di estudio.
*Ki ora ta us’e: Pa diagnostica cu precision enfermedadnan manera e trastornonan of condicionnan neurocognitivo (Alzheimer, TDAH, secuelanan di golpi na cabes (traumatismo), problemanan di siñamento, etc.).
*Beneficionan: Ta identifica cu exactitud e puntonan fuerte y debil di e mente pa asina por crea un plan di tratamento of rehabilitacion.
E clinica Ambulatorio di Neuropsicologia Aruba
E papel principal di e clinica ta concentra riba e evaluacion / e diagnostico funcional y e rehabilitacion neuropsicologico. Como cu nan no ta medico, nan no ta prescribi medicamentonan ni ta realiza intervencionnan cirurgico. E proveedornan di atencion medico (manera neurologo of medico di cas, geriatra, neurociruhano), habitualmente ta referi e pashentnan na un neuropsicologo ora nan mester di aclaracion encuanto un posibel deterioro cognitivo, trastorno neurocognitivo pa curpanan di Lewy, daño cerebral adkiri, epilepsia, etc.
E condicionnan comun cu un neuropsicologo ta evalua ta inclui: Lesionnan cerebral traumatico (LCT), concusionnan cerebral, Trastornonan Neuro-Degenerativo manera Alzheimer, Parkinson, etc., condicionnan (trauma) cerebrovascular, Trastornonan di desaroyo y di siñamento manera TDAH (ADHD) y autismo, Epilepsia y trastornonan convulsivo.
Si un persona mester di un evaluacion neuropsicologico—sea despues di a sufri un accidente of pa balora su estado cognitivo, un di dos opinion pa sigui un tratamento (‘second opinion’)—ta di sumo importancia pa e bay den prome luga cerca un neurologo. En caso cu e Neurologo of un otro specialista determina cu tin mester di pruebanan neuropsicologico especifico, e pashent por wordo referi na e unico centro specialisa riba e isla: e “Neuropsychological Ambulatory Aruba” (Ambulatorio de Neuropsicología Aruba).
Un Ehempel Practico (Con nan ta integra):
Imagina cu un familiar of un tata ta lubidando unda e ta pone e yabi di auto.
*Paso 1 (MoCA): E medico di cas ta aplica e prueba di MoCA di 10 minuut den su consultorio. E score ta resulta un poco baha (por ehempel, 22 or di 30 punto). E MoCA a duna un luz cora: tin algo cu mester investiga mas leu.
*Paso 2: E medico di cas ta referi e pashent cu un carta di ‘verwijzing’ pa un examen Neuropsicologico completo. E neuropsicologo ta investiga durante mas o menos 5 ora. E resultadonan Neuropsicologico ta determina structuralmente, por ehempel, cu e lubidamento no ta bini di stress of depresion, sino cu tin un daño of disfuncion especifico den e celebro, confirmando un inicio sutil di Alzheimer of un otro causante Reversible of No-Reversible.
Notanan importante:
*Ta di sumo importancia cu, como pashent, bo puntra e profesional tocante su trayectoria ora nan referi bo pa un evaluacion neuropsicologico. No ta di mas pa pidi pa mira su titulonan of diplomanan. Esaki ta evita cu nan ta manda bo di kashi pa muraya y stroba bo obtene un diagnostico confiabel na tempo.
*E evaluacion neuropsicologico confiabel y urgente NO ta ser cubri pa AZV.
*Pa un evaluacion cognitivo inicial (screening) subsidia (cu NO ta pa diagnosis), por dirigi bo mes na Centro di Memoria.
