Parlamentario di fraccion di AVP, John Hart, a trece dilanti e importancia di e Ley di Pension General Aruba (LAP) pa empleadonan den sector priva, enfatisando e necesidad urgente pa e ley aki haya e atencion y e supervision adecuado cu a keda pendiente pa varios aña.
E Ley di Pension General (Landsverordening Algemeen Pensioen – LAP) a wordo introduci na aña 2011 durante Gabinete Eman 1 cu e obhetivo di garantisa cu tur trahado den sector priva, na momento di yega nan edad di pension, por tin e siguransa y e poder di compra necesario pa gosa di un bida digno despues di a labora e di hard den mercado laboral. Bou di e skema aki, e doño di trabou ta retene un premie for di e salario cu ta wordo aloca den un fondo special pa e empleado.
Hart a señala cu na aña 2017, e Raad Sociaal-Economische (SER) a realisa un evaluacion di e ley aki y a comunica na e Gabinete Wever-Croes 1 e tempo ey cu tabata falta un entidad supervisor (toezichthouder). Maske e ley mes ta stipula presencia di un supervisor, den practica esaki nunca a wordo nombra entre 2017 y 2024. Segun Hart, e gobiernonan anterior no a duna e ley e atencion mereci ni a drenta den un dialogo concreto cu e doñonan di trabou pa beneficia e trahadonan di sector priva.
Como un di su prome mocionnan ora el a drenta den politica den nomber di fraccion di AVP, John Hart a exigi pa Gobierno duna e ley LAP e atencion debi y pa nombra un toezichthouder sin mas tardanza.
Recientemente, den e discurso di Apertura di Aña Parlamentario Nobo pronuncia pa Gobernador, a wordo confirma cu e ley aki lo bay wordo trata pronto den Parlamento. Hart a expresa su satisfaccion di mira cu e mocion ta hayando contenido y atencion debi, refutando e criticanan di opositornan politico cu ta sostene cu mocionnan no ta haya oido.
Debate necesario despues di mas di 15 aña
Hart a subraya cu e rol di Parlamento ta pa keda skerpi y para na vanguardia di e trahadonan na Aruba. El a expresa su deseo pa e debate parlamentario tuma luga pronto pa asina evalua e cambionan necesario:
“Despues di 15, 16 aña, e ta importante pa bo bay habri un debate trobe riba con e ley aki ta y kico ta e cambionan cu tin cu bini. Nos tin cu keda skerpi y para na vanguardia di e trahadonan na pais Aruba,” Hart a conclui.