Despues di un prome foro exitoso unda a presenta e resultadonan di un investigacion di cinco aña riba e potencial y urgencia di intervencion na San Nicolas, ta cla pa e di dos echender di e Foro riba Futuro di San Nicolas. E evento aki lo tuma luga diàsabra 19, dialuna 21 y diamars 22 di september, di 6:00 PM pa 9:00 PM na Teresita Center.
Suzette Dumfries un economista independiente a traha e plan aki pa su Pais.E meta principal di e di dos foro aki ta pa pasa di vision pa accion concreto. Durante e tres dianan aki, lo presenta e “Plan Dumfries 2030”, un propuesta integral cu ta abarca no solamente e desaroyo economico, sino tambe e aspectonan social y cultural di e region.
E foro aki lo duna contesta riba preguntanan clave tocante e ehecucion di e plan: con e desaroyo lo wordo organisa, kende lo ta e actornan encarga cu e ehecucion, con lo financi’é y kico ta e base legal (juridische verankering) cu mester pa e institucionnan por funciona debidamente. Maske e iniciativa aki a nace como un proceso independiente di nation building, e plan tambe ta identifica e rol concreto cu Gobierno mester hecuta.
E encuentro aki ta reuni tur e actornan clave pa e futuro di San Nicolas: representantenan di Gobierno, institucionnan financiero, inversionistanan, organisacionnan local y e pueblo di San Nicolas mes.
Aunke e cupo pa institucionnan y sector priva ta casi completamente sold out, ta haci un yamada special na e habitantenan di San Nicolas pa nan tambe ta presente, tuma nota di e plan y sea parti activo di e discusion riba e resultadonan cu ta busca pa logra.
Detaye di e evento y registracion
- Fecha: Diàsabra 19, dialuna 21 y diamars 22 di september
- Orario: 6:00 PM – 9:00 PM (tur tres dia)
- Luga: Teresita Center, San Nicolas
- Entrada: Gratis
Registracion: Pa e pueblo di San Nicolas y e region completo cu kier asisti, por registra via e website official: suzettdumfries.com/sannicolas. Pa adultonan mayor of personanan cu no tin acceso na internet, por manda un mensahe via WhatsApp na e number 740-5430 pa confirma asistencia.