Parlamentario Jennifer Reyes a expresa su preocupacion pa e manera cu situacionnan na Aruba ta creciendo y casi birando crisis debi na falta di atencion pa problemanan structural cu mester wordo atendi.
Segun Reyes, durante transcurso di añanan por a observa cu no a atende debidamente cu e problemanan aki, y aworaki e pais ta ricibi “e cuenta”, yegando na situacionnan hopi fastioso.
Entre e kasonan mas di atencion, Reyes a cuminsa cu e situacion di hospital, caminda e directiva mes a menciona cu nan tin problema financiero. Banda di esaki, e parlamentario a señala e situacion di e scolnan, caminda tin un lista sumamente grandi y cuantioso di renovacionnan cu ta necesario pa e scolnan di Aruba.
Reyes a trece dilanti cu durante transcurso di añanan a traha duro pa baha e debenan di GDP. Sinembargo, den media CFT a menciona cu falta inversion pa Aruba structuralmente.
E parlamentario a indica cu pa fin di aña 2027 tin un pronostico caminda e debt-to-GDP ta bay yega un 53%. Esaki ta anticipa cu mientras tabata premira pa yega un schuldanker di 50% na aña 2035, ya caba pa diferente aña prome cu esey ta yegando e parti di e schuldanker.
Ante e panorama aki, Reyes a lanta e pregunta riba e impacto di e cortamento di gasto den e pais:
“Awor e pregunta ta: nos a bezuinig hopi riba diferente topiconan, diferente areanan cu merece e atencion, caminda nos por a wak por ehempel e parti di HOH, Hospital di Aruba, caminda hopi biaha nan a mantene e bedragnan igual cu talbes 10 o mas aña pasa.”
Reyes a conclui cu aworaki, mirando hacia dilanti, tin inversionnan cu mester wordo haci debi na e aumento di e costo di bida, locual ta haci cu caminda tin cuentanan aworaki, tin dificultad pa paga nan.