Loke cu mester a bira e ehempel di “politica nobo” y un modelo di transparencia, awe ta converti den un di e scandalnan mas grandi di silencio y condemento. E asunto di e jet priva di Minister Gerlien Croes ta sigui escala den un bataya legal y politico sin precedente, laga e pueblo cu un solo pregunta clave: Kico e minister tin di sconde?
E asunto a tuma un rumbo decisivo despues cu e Comision di Conseho pa Asuntonan di Bezwaar (Bezwaaradviescommissie LAR) a duna e peticionario completamente rason.
E veredicto tabata cla: e minister mester duna contesta. Sinembargo, en bes di duna cara na pueblo, e mandatario a opta pa manda un carta pa e comision caminda el a haci afirmacionnan cu a ser cataloga directamente como mentira y un burla pa e sistema di husticia.
Den su carta, Minister Croes a menciona cu el a paga “un parti di e landing fee” na Corsou. Pero e burla ta bira mas grandi ora cu el a nenga categoricamente pa duna detayenan fundamental:
Cuanto el a paga exactamente?
Na ken e pago aki a bay?
Ki dia e transaccion a tuma luga?
Segun Lider di fraccion di MEP Evelyn Wever Croes e mandatario simplemente a cera porta y a declara cu e no ta bay duna ni un solo informacion mas. E actitud aki ta kibra completamente e promesa electoral di un gobernacion limpi y transparente, transformando e discurso di “cambio” den un muraya di silencio cu ta haci holo na iregularidad grave.
Avance pa desenmascara e berdad:
Accionnan legal y politico no ta keda aki. E bataya pa transparencia ta sigui den varios front simultaneamente pa obliga e mandatario pa rindi cuenta pa su actonan:
E bala ta den scochi di Parlamento: E asunto aki ta rekeri accion inmediato di e presidente di Parlamento, Marlon Sneek, pa no sigui tapa pa e minister ni wanta e proceso di control democratico.
Proceso di LAR ta continua:
E caminda via corte di LAR ta sigui firme pa obliga e entrega di tur documento y prueba cu e minister ta rehusando di duna.
Cuestion di integridade y corupcion:
E caso ta bay wordo hiba intensamente dilanti Ministerio Publico y Bureau Integriteit pa determina si e falta di claridad aki ta crusa e linea di eynan pa bira un acto di corupcion formal.
E echo cu un mandatario ta prefera di enfrenta varios caso legal, comision di bezwaar y investigacionnan di integridad, enbes di contesta tres pregunta simpel, ta lanta un preocupacion enorme den comunidad. Su actuacion den e caso aki no solamente ta laba e credibilidad di e gobierno actual AVP-FUTURO, sino cu e ta habri un cuestionamento profundo si e mandatario aki tin e autoridad moral y politico pa por keda den un posicion di mando pa Aruba. E presion pa e berdad sali na luz lo no stop aki.
Tanten cu e caso aki ta andando , si bin un eleccion nobo e minister actual Gerlien Croes no lo pasa e screening pa por bira minister , y si dado caso si e caso sigui encamina y lo determina cu lo investiga e mandatario cu si a crusa e linea y di eynan e caso por bira un acto di corupcion formal, Minister Gerlien Croes nunca mas lo por bira minister. Pesey mes ta importante pa e mandatario duna cuenta pa asina e por sali di tur e dudanan cu tin.