Entrante prome di november 2026 Christopher Frans ta tuma despedida como secretario insular di Entidad Publico Boneiro. Frans a eharce e funcion aki for di prome di maart 2023 y el a dicidi pa acepta un reto nobo.
Frans ta trahando for di december 2013 na Entidad Publico Boneiro y den e añanan tras di lomba el a desempeña diferente funcion. E tabata entre otro consehero di maneho senior na directorado di Comunidad y Cuido, consehero administrativo na Gabinete di Gezaghebber y secretario insular adhunto, prome cu na aña 2023 el a haña nombramento como secretario insular.
Como secretario insular Frans tabata responsabel pa duna guia na e organisacion publico, y pa asesoramento y sosten di Colegio Ecutivo.
Cu aprecio Frans ta wak bek riba su tempo na Entidad Publico Boneiro. Aunke no tabata un decision facil, e ta anhela su reto nobo. “Cu hopi aprecio mi ta wak bek riba e colaboracion cu mi coleganan. Mi ta agradesido na Colegio Ecutivo y Conseho Insular pa e confianza, y na e organisacion publico pa e sosten y colaboracion durante e ultimo añanan. Hunto nos a compromete nos mes cu nos organisacion y cu Boneiro. Mi ta spera cu tur hende ta sigui traha duro cu e mesun enbolbimento, caminda interes general di nos comunidad semper ta na prome luga”, segun Frans.
Na nomber di Entidad Publico Boneiro, Colegio Ecutivo ta expresa su aprecio pa e compromiso y enbolbimento di hopi aña largo di Christopher Frans. Colegio Ecutivo ta gradici Frans pa su aporte na desaroyo di e organisacion publico y pa e colaboracion den e añanan tras di lomba, y ta desea Frans hopi exito y tur cos bon cu continuacion di su carera.
Remplaso temporal di secretario insular For di prome di november 2026 secretario insular suplente Roxanne Francees ta actua como secretario insular interino.