Colegio di supervision financiero Corsou y Sint Maarten (Cft) ta enfatisa cu
crecemento di turismo ta trece oportunidadnan economico pa Corsou, sin embargo, e ta
expone retonan nobo tambe. Cft ta conseha Gobierno pa yega na un vision integral y
coordinacion claramente enfoca riba e desaroyo desea di turismo. Solamente di e manera aki,
turismo por contribui na prosperidad y sostenibilidad financiero riba termino largo tambe.
E desaroyo di turismo ta un motor di crecemento economico importante pa Corsou. Sin embargo, e exito
persistente ta conduci na un aumento di e presion riba e capacidad financiero di e isla. Tur biaha mas,
facilidadnan publico y recursonan natural ta yega na nan limite. Ehemplonan di esaki ta inclui e
capacidad di aeropuerto, e aumento di aglomeracion den trafico, e presion riba e mercado di vivienda y
e estado di salud di e rifnan di coral.
Cft ta mustra riba e hecho cu crecemento descontrola finalmente por mina e atractivo di Corsou como
destino turistico. P'esey, crecemento continua ta rekeri maneho di Gobierno, cooperacion cu partnernan
social y inversionnan dirigi entre otro den infrastructura, procesamento di residuo, energia y
conservacion di naturalesa.
Structura economico
E crecemento di turismo ta cambia e structura economico di e isla tambe. Cifranan di Fondo Monetario
Internacional ta mustra cu e empleo ta cambia tur biaha mas pa funcionnan di pago reduci den turismo
y pa actividadnan informal, mientras tin reduccion di puestonan di empleo formal. Esaki tin
consecuencianan pa e entradanan di impuesto y financiamento di seguronan social.
Tin oportunidadnan pa Corsou pa aumenta e plusvalia economico di turismo. Cft ta subraya e
importancia di crecemento cualitativo en bes di cuantitativo di turismo. Mester enfoca riba un aumento
di empleo formal, mas productividad laboral, mas plusvalia economico local y un base fiscal mas amplio.
Incentivanan financiero y fiscal dirigi por apoya e desaroyo desea di turismo. Di e manera aki, desaroyo
di turismo por contribui na un economia sostenibel prepara pa futuro.
Presupuesto pa 2027 y añanan posterior
Entre otro debi na desaroyonan economico favorabel, pa e periodo 2027-2030, Corsou ta estima
surplusnan presupuestario amplio. Sin embargo, e economia ta keda vulnerabel pa shocknan y
riesgonan financiero. Ademas, Corsou ta enfrenta diferente desafio financiero. Por ehemplo, ainda no a
finalisa e solucion pa e situacion financiero di Curaçao Medical Center. Desde un punto di bista mas
amplio, e sostenibilidad financiero structural di e fondonan di cuido y seguridad social ta un reto
considerabel. Considerando e presion di gastonan colectivo halto riba Corsou, ta importante pa
implementa reformanan den cuido y seguridad social pa asina salvaguardia e sostenibilidad financiero.
