Micheila Trinidad, ganado di e accion di gana ‘Boneiro ta bai PSV’, hunto cu su yiu muher Allisha Trinidad, dia 15 di october a experiencia un dia especial na Eindhoven. Durante nan bishita nan a cera conocemento cu diferente componente di PSV, nan a tira un bista tras di cortina di e club y nan a experiencia e mundo di futbol profesional di serca.
Pa Allisha, cu e mes tambe ta forma parti di un ekipo di futbol na Boneiro, e bishita tabata extra especial. E bishita a brinda Allisha un oportunidad pa descubri e ambiente di futbol profesional di PSV y experiencia un entrenamiento di e ekipo femenino di PSV di serca. E experiencia aki a forma un bunita oportunidad pa haña inspiracion, obtene impresion nobo y sigui fortifica su entusiasmo pa futbol. Banda di esaki mama y yiu por a gosa hunto di un experiencia unico y crea recuerdo valioso.
E programa a cuminsa parti mainta cu un recorrido na De Herdgang, e complejo di entrenamiento di PSV. Seguidamente Micheila y Allisha a haña oportunidad pa presencia un parti di e entrenamiento di e ekipo femenino di PSV. Na final di esaki tabatin espacio pa colecta firma. E dia a continua cu un recorrido den Philips Stadion. Durante e recorrido aki nan a haña oportunidad pa descubri e stadion y e mundo tras di e club mas aleu.
Tourism Corporation Bonaire (TCB) a organisa e accion di gana ‘Boneiro ta bai PSV’ y ‘PSV ta bai Boneiro’, den colaboracion cu PSV y Entidad Publico Boneiro. Marjolein Oleana, Business Manager & Europe Liaison na TCB, ta contento cu nos poblacion local di Boneiro tambe ta haña chens pa obtene experiencia especial.
“Ta algo bunita cu habitantenan di Boneiro, danki na e colaboracion aki, por adkiri experiencia y inspiracion nobo. Cu Micheila por a experiencia esaki hunto cu su yiu muher Allisha, ta hacie extra especial. Pa deportistanan hoben un bishita asina por ta un bunita estimulo pa sigui desaroya nan mes,” segun Oleana.
E bishita na Eindhoven ta forma parti di e premio cu Micheila a gana cu e accion di gana ‘Boneiro ta bai PSV’. E biaha a brinda mama y yiu un oportunidad pa experiencia PSV di serca y pa cera conocemento cu e ambiente deportivo y cultural di e region di Brainport.
E colaboracion entre Entidad Publico Boneiro y PSV a ranca sali na aña 2022 y e ta enfoca riba fortificacion di e lasonan social, deportivo y economico entre Boneiro y e region di Brainport na Eindhoven. Desaroyo di deporte, desaroyo di talento y intercambio di conocemento ta forma componentenan importante di e colaboracion aki. Desaroyo di futbol femenino tambe ta haña atencion especial den esaki, cu como meta pa crea mas posibilidad pa mucha muher y hende muher pa desaroya nan mes den e deporte aki. Dentro di e colaboracion, TCB ta responsabel pa mercadeo y promocion di Boneiro.
Cu e accion di gana aki e partnernan di colaboracion kier sigui fortifica e laso entre Boneiro y Eindhoven, y enbolbi habitantenan di Boneiro activamente cu e colaboracion aki. E bishita di Micheila y Allisha ta mustra con deporte, turismo y intercambio cultural por conecta hendenan y regionnan cu otro. Na mes momento e ta brinda deportistanan hoben manera Allisha un posibilidad pa obtene inspiracion pafo di nan propio ambiente y descubri perspectiva nobo.
Tourism Corporation Bonaire ta gradici PSV, y especialmente Laurens van Leuken, pa e recepcion y e oportunidad pa haci e experiencia especial aki posibel. TCB ta expresa su gratitud tambe na Corendon pa a sponser e pasashinan cu avion.
