Politica

Alvin Molina (MEP): San Nicolas merece haya Secrets of Aruba pa sali di scuridad di algun decada

Hotel Secrets 3

Mi tin tur comprension pa posicion di tur hende envolvi den e asunto di construccion Secrets of Aruba. Pero mas cu tur cos, mi tin comprension pa San Nicolas. Pa hopi aña a scucha hopi promesa pa recuperacion di San Nicolas y Bisinario, pero relativamente poco a wordo haci. Awo cu Aruba ta drentando e temporada di recuperacion, ta momento pa crea oportunidadnan nobo. Ta e momento pa San Nicolas su nomber tambe cuminsa resona banda di esun di Aruba. Esaki ta loke Parlamentario Alvin Molina (MEP) ta bisa.

Diferencia di opinion tin tur dia, den tur area y pa tur sorto di motibo. Pero ta asunto di sinta y papia pa yega un solucion cu ta beneficia tur hende. Den caso di Secrets of Aruba, cu lo bira e prome hotel di renombre internacional na San Nicolas, ta bon pa nos pone kico ta nos metanan comun pa pariba di brug. Nos tur kier pa San Nicolas haya e desaroyo priminti, manera den Bijbel ta papia di e tera priminti. A dura hopi pa nos haya nos fair chance y cu Secrets of Aruba, esaki lo bay sosode finalmente. E lo crea un desaroyo positivo pa pariba di brug completo. 

Mi ta contento cu San Nicolas Business Association, cu ta lucha pa derecho di desaroyo di San Nicolas, a invita mi persona pa ta presente na nan conferencia di prensa. Aki nan a haya e chens di expresa nan preocupacion pa cu tardansa den e proyecto aki. Ya caba pandemia di COVID-19 a causa un retraso den ehecucion di e proyecto.  San Nicolas a warda y mi ta compronde SNBA cu ta encurasha desaroyo di proyecto manera esun di Secrets. 

E ciudadanonan aki di SNBA cu tin decadanan di experencia cu comercio na San Nicolas (of pariba di brug), a conoce e tempo di gloria pa despues poco-poco mira con e districto a keda bay atras. No solamente e centro comercial pero den tur e barionan di e districto aki. Gran mayoria di e ciudadanonan mester a bandona nan luga di nacemento y bay gana nan pan pabou di brug. Y esnan cu a keda, a sinti e efecto financiero di biba pariba y traha pabou. Temponan di calidad cu famia a bay perdi, gasto di transporte ta come un gran parti di nan entradanan. Pesey nos tur di pariba kier mira porfin un desaroyo positivo pa e area di San Nicolas.  Secrets ta duna nos e speransa y Gobierno di Aruba a compromete su mes pa percura pa inversion tuma luga na e area  aki cu tambe ta forma parti di Aruba. Trahando hunto, sintando na mesa y papiando cu otro, finalmente nos por saca San Nicolas di e scuridad di decadanan largo. 

Hotel

Ta prome biaha cu San Nicolas ta conoce un proyecto turistico di e magnitud aki. E ta un proyecto cu lo trece movecion durante su construccion y na momento cu e bay den operacion. Personanan cu traha den construccion lo cumpra den e negoshinan na San Nicolas. Esaki ya caba lo ta un spin off.

Desaroyadonan no ta supose di solamente ta pinta riba un mapa y cla. A haci investigacion di bisindario pa sa kico ta cuadra cu e ambiente di e area, ki tipo di infrastructura ta adecuado, pero tambe con pa incorpora tur aspecto local den e hotel Secrets. Den esaki a pensa riba tur e tipo di atraccionnan cu lo bay tin mester pero tambe con e crecemento nobo aki lo afecta e area y e pueblo. Ta papia aki por ehempel di mas demanda cierto tipo di servicio, manera di IMSAN y recreacion. Den tur esaki a envolvi stakeholdernan pa yega na e miho proyecto posibel pa San Nicolas y Aruba.

Ta papia di 300 cupo di trabou cu lo beneficia principalmente esnan di pariba cu ta sin trabou, cu a perde trabou durante pandmia of cu ta prefera di traha pariba pa tin menos gasto di transporte. E mesun ciudadanonan aki lo cuminsa cumpra mas na San Nicolas, enbes di cumpra riba caminda pa cas pabou di brug. 

Nos lo bay mira tambe mas movecion den centro comercial di San Nicolas, cu pa hopi aña ta porta cera so por a mira. Gobierno y Parlamento difere.

Hotel Secrets 3Hotel Secrits 2Hotel Secrits 1

Related posts

Duaneronan a cumpli 30 aña di servicio

EA News Author

Abo por ta wowo y un man pa Bureau City Inspector (BCI)

EA News Author

Ken ta wewe? E mascota di weganan Escolar 2022

EA News Author

Leave a Comment

Whatsapp Message