Local

ARUBA ONE HAPPY ISLAND LIONS CLUB A HACI DONACION NA VARIOS INSTANCIA PA FAMIANAN DEN NECESIDAD RELACIONA CU E SITUACION DI COVID-19


ORANJESTAD,Aruba

Diabierna ultimo Aruba One Happy Island Lions a haci donacion di productonan na un total di 8 instancia e.o. Fundacion Pa Nos Comunidad, Fundacion Oasis of Love, Imelda Hof, Stichting Algemene Bejaarden Aruba, Stichting Hope, Fundacion Juan Pablo Duarte y varios famia den necesidad. Nos pais igual cu mundo henter ta pasando den un situacion dificil pa motibo di COVID-19 y e consequencianan cu esaki ta trece cune. Donacion di pakete di cuminda na esnan den necesidad ta un di e programanan di servicio humanitario di Lions Club Internacional pa asina yuda combati hamber. Como organisacion nos kier contribui pa miembronan di comunidad tin acceso na alimentacion. E donacion haci na e diferente instancianan aki lo wordo entrega na famianan den necesidad. Aruba One Happy Island Lions Club cu e obra aki ta duna di nos parti pa asina yuda famianan cu ta den necesidad urgente. E donacionnan aki por wordo realiza danki na un contribucion special y cooperacion cu e organisacion a ricibi pa cual den nomber di Aruba One Happy Island Lions Club y tur e famianan nos ta gradici pa e bunita gesto aki. E atardi aki tambe como muestra di aprecio Aruba One Happy Island Lions Club a haci uso di e oportunidad pa treat miembronan di Cuerpo Policial cu dushi koekinan. E organisacion di Leonnan den servicio na comunidad ta gradici y reconoce e trabao y esfuersonan haci di tur sector den nos comunidad, publico, priva y como tambe tur organisacion no-gubernamental y boluntarionan cu ta dunando un man pa asina alivia famianan cu ta pasando den un situacion hopi dificil. Danki y cu hunto nos keda demostra e solidarismo y empatia pa esnan cu mas mester di dje den nos comunidad den e periodo dificil aki.  


Related posts

Kayaker ta hanja kurpa sin bida den Pali Mangel

EA News Author

Diahuebs awor ta inicia Playa Film Festival

EA News Author

Resumen di casonan di covid-19 na Aruba pa awe

EA News Author

Leave a Comment