‘Biketeam’ di KPCN visibel durante festival riba laman

Awe, djasabra 5 di ougùstùs e ‘biketeam’ di KPCN lo patruyá na diferente sitio den Playa en konekshon ku e festival riba laman entre e waf di Karel’s beach bar i Waf Chicu Mercelina (waf di nort). Durante e evenemento, e ‘biketeam’ ta aktivo ku mantenshon di órden. Un di e benefisionan mas grandi di e ‘biketeam’ ta ku nan ta hopi móbil; nan por lora rápido i nan por move fásil den un multitut, hanchi i kaya smal. P’esei e ‘biketeam’ ta ideal pa patruyá durante kualke aktividat ku tin hopi hende riba kaya. Ademas Kuerpo Polisial Hulanda Karibense huntu ku Wardakosta, Duana, Koninklijke Marechaussee i Entidat Públiko Boneiru, ku huntu ta forma e Punto di Konekshon Marítimo Multidisiplinario Boneiru (MMHB), lo ta riba laman pa tene supervishon i kontrolá pa sòru ku e festival riba laman ta kana bon i seif.