Bonaire Featured

‘Bon kompra plùs’: E makutu básiko pa konsumidó


Último tempu Entidat Públiko Boneiru aktivamente a hasi esfuerso pa sostené forsa di kompra di nos poblashon. A baha por ehèmpel preis di koriente i kaminda ta posibel ta purba tene kosto di bida bou di kontròl. Sinembargo, pa motibu di faktornan eksterno i preis di kombustibel ku kada biaha ta subi, gastu di kuminda ta oumentá. Pa frena e efekto akí un tiki, gobièrnu di Boneiru ta lansa awor akí e proyekto ‘Bon Kompra Plùs’ den kolaborashon ku e Unidat di Asuntunan Ekonómiko di Direktorado di Planifikashon i Desaroyo, Direktorado di Supervishon i Mantenshon di Lei, UNKOBON, Fundashon Tienda pa Konsumido Boneriano i e supermarketnan.

‘Bon Kompra Plùs’ ta konsistí di un makutu básiko di 38 produkto di promé nesesidat kaminda kada un tin un preis máksimo. A base di interes general Kolegio Ehekutivo no ke pa bende e produktonan akí riba e preis máksimo stipulá. Banda di esei intenshon di e programa ta pa hasi e konsumidó boneriano konsiente di su komportashon di kompra. For di inisio e supermarketnan ta enbolbí den e proseso i nan a haña oportunidat pa partisipá aktivamente na introdukshon di un medida di preis.

Ku e forma partisipativo akí di stipulashon di preis máksimo, den un forma mas práktiko posibel ta ehekutá e Lei di Preis BES (Prijzenwet BES). Ta stipulá preis máksimo  a base di e marka mas popular i un produkto sin un marka spesífiko. Pa kada tipo di produkto lo stipulá tin ora dos òf mas preis máksimo. Den e 38 produktonan tin entre otro bèrdura, fruta, aros, kòfi, kuminda pa beibi, pero tambe toaya femenino (maandverband) i pèmpers. Regularmente lo evaluá e preisnan i konstelashon di e makutu.

Pa mas informashon tokante e programa di ‘Bon Kompra Plùs’ por tuma kontakto ku Unidat di Asuntunan Ekonómiko di Direktorado di Planifikashon i Desaroyo.   

Related posts

LVV Boneiro ta stimulá kunukeronan pa planta ‘buffelgras’

EA News Author

Resientemente Sr Cees Luckhardt, konosido outor I periodista Hulandes a bishita Nos Kier Boneiru Bek I

EA News Author

Minister Xiomara Maduro: Parlamento a aproba ley cu ta regla validez di acuerdonan cera di forma electronico

EA News Author

Leave a Comment