Detenshon pa maneha bou di influensia di alkohòl
Djaweps 5 di febrüari, alrededor di 10:50 anochi, e meldkamer sentral a risibí notifikashon tokante un aksidente riba Kaminda di Tera na altura di Santa Clara. Ora e patruya a yega, nan a topa ku un vehíkulo den mondi ku motor sende, mientras ku e shofùr tabata sentá tras di stür.
Durante e kòntròl, e shofùr no a por mustra un reibeweis ni prueba di seguro bálido. Un tèst di supla a indiká ku e a konsumí mas alkohòl ku ta permití pa lei. E hòmber di inisial M.A.I., 59 aña, a wordu detené i a hib’é warda di polis.
Kòntròl planiá riba ‘fatbike’
Djaweps 5 di febrüari, den oranan di anochi, un grupo di hóben a realisá un kòntròl plania tokante ‘fatbike’. Agentenan a kontrolá e velosidat di tur e fatbikenan, i dos di e sinku vehíkulonan kontrolá tabatin mas kore ku loke ta permití. E dos fatbikenan a wordu konfiská pa mas investigashon riba un ‘rollerbank’.
Sambuyadó ta fayesé
Djaweps 5 di febrüari, alrededor di 4 or di atardi, e meldkamer sentral a risibí notifikashon tokante un turista ku a bira malu den laman na Klein Bonaire. Personanan ku tabatin boto na serkania a saka e persona for di laman i transport’é pa e pir na jachthaven, kaminda personal di ambulans tabata kla pa duna asistensia médiko.
Na yegada, nan a kuminsá mesora ku reanimashon, pero apesar di tur esfuerso, no a logra e resultado deseá. E víktima, un hòmber merikano di inisial C.D.L., 57 aña, a fayesé na e sito.
Outo ta bòltu
Djaweps 5 di febrüari, alrededor di 3:20 or di atardi, un outo a bòltu riba Kaminda Gurubu. E shofùr a pèrdè kòntròl di e stür, despues ku e vehíkulo a termina den mondi riba su dak.
Konforme ku e maneho botsen is blazen, nan a hasi un tèst di supla ku e shofùr, pero e resultado a indiká ku no tabatin uso di alkohòl. Ademas, e shofùr a haña un but pa maneha sin un reibeweis bálido.
Detenshon pa menasa
Djaweps 5 di febrüari, alrededor di 11:30 or di mainta, un hòmber di inisial R.R.R.M., 32 aña, a wordu detené riba Kaminda Lagun pa destrukshon i menasa. E sospechoso a destrui artíkulonan den un kas i a menasá varias persona ku morto. Investigashon den e kaso ta continuá.