Tourism Corporation Bonaire (TCB) a kompartí
informashon turístiko preliminario pa luna di yanüari 2026, for di kua ta resultá ku
Boneiru a risibí 18.606 bishitante stayover. Esaki ta un oumento leve di 0,04% kompará
ku luna di yanüari 2025, ora ku 18.598 bishitante a yega nos isla.
E bishitantenan for di Hulanda a forma e grupo di mas grandi, representando 48,4% di e
kantidat total di yegada ku 9004 bishitante. E bishitantenan for di Merka tabata e di dos
grupo mas grandi, representando 26,9% di e kantidat total di yegada ku 5000 bishitante.
En total 1432 bishitante (7,7%) for di Kòrsou a bishitá nos isla, siguí pa Canada ku 938
bishitante (5%), Alemania ku 311 bishitante (1,7%), Aruba ku 239 bishitante (1,3%), Bélgika
ku 206 bishitante (1,1%), Colombia ku 135 bishitante (0,7%), Reino Uní ku 134 bishitante
(0,7%), Suisa ku 113 bishitante (0,6%) i Brazil ku 118 bishitante (0,6%),
Mayoria di e bishitantenan for di Merka a biaha ku un partner, siguí pa esunnan ku a biaha
nan so. Mayoria a bini pa vakansi (52,4%), sambuyamentu (35,9%) i pa bishitá amigu i
famia (3,1%). Mayoria di nan a hospedá den un hotèl (48,7%), un vila (16,2%), un
apartamento (8,5%), nan propio bibienda (6,4%) òf serka un miembro di famia (5,8%). E
bishitantenan for di Merka a bini prinsipalmente for di Florida, New York, California,
Texas i North Carolina. For di e repartishon di edat ta resultá ku e biaheronan di 65 aña
bai ariba a representá 29,6% di e bishitantenan, miéntras e biaheronan di 55 pa 64 aña a
representá 27,7% di e kantidat total di bishitante.
Mayoria di e bishitantenan for di Hulanda tabata personanan ku a biaha huntu ku un
partner, siguí pa esunnan ku a biaha nan so. Mayoria bishitante a bini pa vakansi (72,1%),
pa bishitá amigu i famia (9,6%) i pa negoshi (5,3%). Mayoria di e bishitantenan a hospedá
den un hotèl (46,4%), siguí pa un apartamento (16,9%), serka un miembro di famia (10,4%),
den un vila (7,1%) i den nan propio bibienda (4,5%). Mayoria di e bishitantenan hulandes a
bini for di Noord-Holland, Zuid-Holland, Gelderland, Noord-Brabant i Utrecht, kaminda e
grupo di edat di 55 pa 64 aña (26,7%) i e grupo di edat di 25 pa 34 aña (16,9%) a forma e
segmentonan di mas grandi.
