Un berdad importante cu nos como pueblo nunca mester lubida ta esaki: historia semper lo papia. No solamente lo conta ken a proteha Aruba y ken a yuda hiba e pais padilanti, pero tambe lo pone na cla ken a faya, ken a actua cu dobel intencion y ken a preferi negociacionnan tras di cortina na luga di transparencia pa beneficio di tur.
Aruba tin un trayecto politico y social compleho, forma pa decisionnan grandi cu a marca su desaroyo. Den e proceso aki, tin lidernan cu a bay dilanti cu vision y conviccion, y tin otro cu, segun criticanan, no semper a actua cu e claridad cu pueblo tabata merece. Pero na final, historia no ta scucha propaganda ni discurso momentaneo, historia ta basa riba hecho y consecuencianan.
E reflexion aki ta bira mas relevante den un tempo unda Aruba ta enfrentando cuestionnan serio riba gobernacion actual, maneho financiero y direccion di futuro nacional. Tin bosnan cu ta bisa cu tin un realidad scondi, un caminda cu por hiba pais den un situacion desastroso si no tin control y responsabilidad. Otro ta defende cu decisionnan cu ta wordo tuma awe ta necesario pa stabilidad y progreso.
Den e contexto aki, ex-Primer Minister Nelson Orlando Oduber a sali na cla varios biaha pa splica e vision riba e realidad cu Aruba ta biba awe. Segun Oduber, tin hecho historico y decisionnan pasado cu mester wordo comprondi pa por evalua situacion actual. Su intervencionnan ta provoca debate: algun ta mira Oduber como un defensor di berdad historico, otro ta cuestiona su interpretacion di e evento y splicacion di un berdad cu e mes a forma parti di dje.
Loke ta cla ta cu e pueblo tin derecho di sa tur informacion, sin filtro di negociacion scondi. Transparencia no mester ta opcion, pero obligacion den un democracia madura.
Tempo lo demostra ken tabata cu Aruba y ken tabata cu interesnan personal. E “plakprenchi” di historia lo keda pa mundo henter wak y husga. Paso, finalmente, historia tin un solo berdad y e berdad lo sali na cla, aunke lo tuma tempo.
Aruba ta na un momento crucial. Mas cu nunca, liderazgo, honestidad y responsabilidad ta cualidadnan esencial. Paso manera semper, tempo lo papia.
Ta biba un tension den comunidad y un desconfiansa total actual den gobierno di AVP –FUTURO riba loke ta berdad, realidad, confiansa y respet pa e Pueblo di Aruba, e supuesto cadena di sclavitud cu supuestamente Hulanda a kita pa e islanan den Caribe, e la wordo kita realmente? E PUNT, e PUNTO su tras , acaso e desaroyonan cu ta pasando ta tras di e PUNTO aki? , un sistema nobo di sclavitud no cu sla y golpi , pero emocional, mental y sistema di imprimi?. Kico of con nos por categorisa e trato di gobierno di AVP –FUTRO y Hulanda cu Aruba ? Politiconan actual a demostra cu ta defende Aruba cu palabra , pero cu echos y riba papel e defensa ta minimo of no ni tey ?