Durante e reunion públiko di Parlamento di djaluna 9 di febrüari último, relashoná ku e desaroyonan preokupante rondó di ORYX/VIGOR i Global Oil, Frakshon di Partido Nashonal di Pueblo (PNP) a mantené un posishon firme. Ounke e reunion aki tambe a keda skòrs te ku fin di mart, PNP ta eksigí klaridat i transparensia pa pueblo, partikularmente mirando ku loke a ser primintí na pueblo di Kòrsou no a materialisá te dia di awe. Bo ta mira e diferensia na momentu PNP no ta den gobernashon mas.
Parlamentario Osepa a rekordá Gobièrnu i Parlamento ku for di 2021 PNP a bin ta bati bèl riba e tópiko aki i a tuma PNP na malu pa su posishon kritiko riba esaki: tur hende por kòrda debakel CPR. “Hopi biaha nos a spièrta, nos a papia, i awe nos ta bolbe reuní riba un frakaso ku por a premirá,” Osepa a deklará. E realidat amargo ta ku e promesanan di un kontrato di 30 aña i invershonnan mionario a resultá di ta promesanan bashí. Segun frakshon di PNP, a bende pueblo airu i primintí trahadónan shelu i tera, spesialmente den porta di elekshon, miéntras ku awe Gobièrnu mes mester a para e kontrato.
Un punto krusial ku PNP a trese dilanti ta e ròl di finansa. Tin indikashon ku e departamento di finansa a ‘bati bèl’ ku kosnan ta bayendo robes, pero a ignorá e señalnan aki. P’esei, Frakshon di PNP ta eksigí pa Gobièrnu manda e ‘Risico Matrix’ ku finansa a traha, huntu ku e rapòrtnan di e kuentanan anual (jaarrekeningen).
“Nos ke sa ta kuantu sèn RDK/2Bays a invertí den búskeda di un operador i kuantu sèn a keda awor aki den kaha di 2Bays. No por ta asina ku un grupo chikí ta bira riku riba lomba di e proseso aki, miéntras pueblo ta keda pober,” e lider di Frakshon di PNP, Ruthmilda Larmonie-Cecilia a enfatisá.
Durante e promé tanda, ku a keda suspendé, PNP su parlamentarionan Larmonie-Cecilia, Osepa, Martina i Cijntje a lansa algun pregunta konkreto ku Promé Minister mester kontestá ainda:
- Kiko ta e posishon aktual di 2Bays despues ku a kibra kontrakt ku Vigor?
- Kuantu trahadó 2Bays tin na e momentunan aki den servisio?
- Tin un bista realístiko ki dia Global Oil lo por kuminsá operá i produsí asfalt?
- Kiko ta e estado tékniko aktual di nos refineria?
PNP ta lamentá ku atrobe nos ta na un krusada kaminda e ‘asset’ mas grandi di nos pais ta pará, miéntras nos ekonomia ta dependé di dje. E frakshon ta spera ku ora e reunion reanudá, lo tin kontestanan honesto i dokumentonan riba mesa, i no mas promesa di fantasia.
“Historia lo mustra ku nos a hasi e preguntanan korekto na momento ku otronan a skohe pa keda ketu,” Frakshon di PNP a konkluí.
