Na nòmber di pueblo di Boneiru, mi ta ekstendé nos felisitashon sinsero na Promé Minister Mia Mottley pa su viktoria históriko den e elekshonan di 11 di yanüari ultimo ku a garantisá su di tres mandato komo Promé Minister di Barbados.
Na e reunion di Hefenan di Gobiernu di CARICOM di 2025 na Bridgetown, Barbados, nos tabata honrá pa haña invitashon pa presentá i diskutí e Raport di Evaluashon di Propio-gobernashon di Boneiru, prepará pa un konsehero di Bonaire Human Rights Organization (BHRO) i eksperto di deskolonisashon di Nashonan Uní.
Na e reunion aki, nos tabata tin e privilegio di topa ku Su Ekselensia Mia Amor Mottley despues di varios aña di enkontre na fòrumnan internashonal ront mundu. Tambe nos a haña e oportunidat pa topa ku otro lidernan regional pa sigui diskutí e konklushonnan di e raport i e situashon na Boneiru.
E investigashon ta deskribí kiko a sosodé despues di 10 di òktober 2010, ora Boneiru a keda integrá den e struktura konstitushonal di Hulanda sin konsentimentu di su pueblo. Partikularmente krítiko i alarmante ta e kambio demográfiko for di aproksimadamente 80% boneriano nativo promé ku 10-10-10 pa mas o ménos 30% na 2025, redusiendo e poblashon nativo na un minoría riba su mes isla. Tambe e raport ta analisá e struktura di gobièrnu den kua leinan klave ta wordu determiná na Den Haag, subordinando i eliminando e outoridat di gobièrnu lokal.
Nos a wòrdu invitá spesialmente na Barbados dor di Promé Minister Ralph Gonsalves di St Vincent i Grenadinas, huntu ku su Minister di Asuntunan Eksterior, Frederick Stephenson, pa un reunion bilateral históriko unda e resultadonan aki a wòrdu diskutí na manera sustansial, inkluyendo e importansia di pone Boneiru riba e lista di Nashonan Uní di Teritorionan No Autonomo.
E delegashon di BHRO tambe a sostené enkuentronan ku tur Promé Ministernan di Karibe i lidernan mundial, inkluyendo António Guterres, Sekretario-General di Nashonnan Uní, i representantenan di Union Europeo, promoviendo konsenshi internashonal tokante e trayektoria konstitushonal di Boneiru i preokupashonan di gobernashon.
Bonaire Human Rights Organization ta miembro asosiá di Komishón di Reparashon di CARICOM desde 2023, loke a fortifiká su lucha I kampanja regional na nòmber di Boneiru.
Aunke James Finies, fundadó di BHRO, a dediká mas ku 1,000 dia i ku sakrifisionan grandi, tempu i rekursonan personal pa promové e derecho i bienestar di pueblo di Boneiru, e ta sigui ta wordu ekskluí riba Boneiru. Politikonan lokal i e gobièrnu Hulandes ta usa kada oportunidat pa minimisá òf boikotia e trabou históriko i importante ku Finies ta hasiendo riba e esenario global pa e pueblo i pa e futuro generashonan di Boneiru.
Segun e dicha, “bo no ta profeta den bo mes pueblo.” Aunke e ta wordu subestima I ignora na kas, regional i internashonal e dedikashon sin desmayo di Finies pa elevá e bos di Boneiru ta sigui resoná entre lidernan mundial. Su lucha inkansabel mustra kla ku e Kaso di Boneiru i su pueblo no ta solamente un asuntu lokal pero ta refleha e prinsipionan riba kual a funda Nashonnan Uní, leinan internashonal, i mekanismonan di derecho humano: pa defendé, protehá, i amplifiká e bos di esnan ku mayoria biaha ta marginalisá i ignorá.
