Den un reunion di Comision di finansa, organisacion di gobierno, cultura y deporte diamars 10
di februari San Nicolas Business Association (SNBA) a presenta nan vision pa San Nicolas.
Den e reunion aki AVP y FUTURO a briya latrobe cu nan ausencia door di un situacion cu
fraccion di PPA ta considera un muchachada. Sinambargo fraccion di PPA si tabata presente y
nos por a pone e vision di SNBA banda di e vision di PPA den "Plan Nos Aruba 2050". Hunto cu
SNBA a discuti e futuro di pariba di brug den Parlamento. PPA ta reafirma cu San Nicolas no
por keda wordo uza pa promesa electoral bashi; e mester bira e centro di nos "Orange
Economy" y e Capital di Cultura y Herencia di Aruba.
“Nos ta tuma nota cu e reunion ta revela un realidad preocupante: e pueblo di San Nicolas a
perde confiansa den cambio debi na e falta di decision di gobernantenan. SNBA tin vision cla,
manera e.o. diseño pa Carnival Village Entertainment Center, pero nan ta sinti nan mes exclui
for di e comisionnan cu mester dirigi e desaroyo aki of cualkier otro desaroyo na SAn Nicolas.
PPA ta kere firmemente cu e desaroyo mester bin di abou bay ariba, cu participacion activo di e
gremionan local.
Nos di PPA ta kere cu e desaroyo di San Nicolas como Cultural Heritage City ta encera por lo
menos:
● Inversion Real: No djis 2.5 miyon pa e mainstreet, sino un presupuesto di 17 miyon
florin pa drecha San Nicolas completo, incluyendo Bernhardstraat.
● Economia Creativo (Orange Economy): Fortalece e identidad cultural door di envolvi
e.o. Instituto Pedagogico Arubano (IPA) den proyectonan di arte, creatividad y diseño.
● Reforma den Negoshi: Cambia e destino di edificionan den caya principal y bini cu
leynan moderno pa regula e barnan y proteha e siguridad den area.
● Atencion na e Grandinan: Cu mas di 40% di e poblacion di adulto mayor ta biba pariba
di brug segun SNBA. Den Nos Plan 2050 ta percura pa nan bienestar den un
comunidad bibo y accessibel.
PPA ta cla pa stop e negligencia. Mester di boluntad y curashi pa tuma decisionnan clave
segun un vision pa Aruba y San Nicolas. San Nicolas tin e potencial pa genera entrada y crea
oportunidad pa nos talentonan local. Cu "Plan Nos Aruba 2050", nos ta compromete nos mes
na un transformacion real unda San Nicolas ta brinda como e hoya cultural di Caribe.
PPA: Nos ta cla pa dirigi Aruba y duna San Nicolas e balor cu e merece!
PPA: San Nicolas mester bira e Motor di nos Economia Creativo y Capital di Cultura y Herencia.
