Boneiru a presentá su mes ku un propio stènt, kaminda agentenan di Travel Counsellors por a haña informashon valioso tokante Boneiru. Marjolein Oleana i Annette Emerenciana di Tourism Corporation Bonaire (TCB) tabata orguyoso di por a representá Boneiru na e konferensia importante akí.
Un di e aspektonan mas destaká di e stènt di Boneiru tabata e pintura úniko ku e artista lokal Nochi Coffie a krea spesialmente pa e konferensia akí. TCB a aserká Nochi pa krea un bunita obra di arte, kaminda deliberadamente a laga algun elemento sin kaba ku nan, di manera ku e agentenan di Travel Counsellors a haña e oportunidat pa kompletá nan. E personanan ku a partisipá na e aktividat kreativo akí tabatin chèns pa gana e pintura, loke a resultá den un interakshon eksitante entre e bishitantenan i nos isla Boneiru.
Banda di e aspekto artístiko e stènt di Boneiru a ofresé tambe un eksperensia yen di sabor. E bishitantenan por a disfrutá di Ròm Rincon. TCB ta gradisí The Cadushy Distillery pa a patrosiná Ròm Rincon.
TCB tabata presente na e gala tambe i tabatin su propio mesa kaminda a invitá e agentenan di Travel Counsellors. Akí nan a haña e oportunidat pa na un manera mas personal ainda hasi trabou di ret i establesé kontakto ku representantenan di TCB. E ambiente íntimo akí a promové edifikashon di relashonnan duradero i a fortifiká e laso entre Boneiru i e profeshonalnan di biahe.
TCB ta wak bèk riba un evento eksitoso i ta entusiasmá tokante e posibilidat pa hasi trabou di ret i establesé kontakto ku e agentenan di Travel Counsellors i kompartí mas tokante nos bunita isla Boneiru. E kòmbersashonnan entre TCB i e agentenan a enfoká riba kompartí e karakterístikanan úniko, e bunitesa natural i e hospitalidat kaluroso di nos isla. Pa medio di e interakshonnan personal akí e agentenan por a desaroyá un mihó komprenshon di e diferente posibilidatnan ku Boneiru tin pa ofresé.
1 comment
[…] Source link […]