Bonaire

Buki nobo tokante pasado di sklabitut disponibel na Biblioteka Públiko Boneiru


Biblioteka Públiko Boneiru a kumpra algun buki pa brinda suidadanonan mas komprendementu tokante e pasado di sklabitut di Hulanda i ku esei di Boneiru tambe. Esaki den kuadro di selebrashon di abolishon di sklabitut na Boneiru. En total a kumpra 25 buki nobo ku tin di aber ku e pasado di sklabitut i mundu despues di e periodo akí. Entre 23 di yüni i 2 di yüli 2022 ta ekshibí e bukinan na biblioteka i no ta fia nan. Na bali por reservá e bukinan i e ora ei por fia nan despues di 2 di yüli.

E aña akí tema di e selebrashon ta ‘E forsa di nos historia’. Ku kompra di e bukinan akí biblioteka ke ofresé nos suidadanonan material pa lesa, pa asina nan por lesa tokante forsa di nan historia. Di e manera ei nos suidadanonan por rekonosé nan mes den e bukinan i identifiká nan mes ku e storianan. Tambe e bukinan ta yuda enrikesé komprendementu di e lesadónan ku por ehèmpel mas konosementu di nos mundu i siña komprendé otro mas mihó. De fakto e bukinan ta ofresé mas informashon tokante e pasado di sklabitut di Hulanda ku atenshon pa e konsekuensianan sikológiko i tangibel di esaki. Di e manera akí Biblioteka Públiko Boneiru ke promové konsientisashon tokante e pasado di sklabitut i stimulá empatia entre suidadanonan.

Tin buki disponibel pa tur edat. Pa alumnonan di skol básiko entre otro e bukinan den dos idioma akí ta disponibel, esta ‘Nona bèk den tempu 2: E lantamentu’ (Nona terug in de tijd 2: de opstand) di Monica Clarinda i ‘De reis van Syntax Bosselman’ (E biahe di Syntax Bosselman), skirbí pa Arend van Dam. Pa adultonan (hóben) tin e siguiente novelanan disponibel: ‘Hoe duur was de suiker?’ di Cynthia Mc Leod, ‘Het Antiracismehandboek’ di Chanel Lodik, ‘Slavernij’ emití pa Rijksmuseum i tambe e antologia ‘Zwart’ skirbí pa outornan afro-oropeo di Hulanda.

Lesamentu di literatura ta sumamente importante pa nos desaroyo general. E ta kontribuí na mihó prestashon na skol i na trabou, na mas konosementu propio, na mas empatia i na un mihó komprendementu di mundu. P’esei nos ta invitá bo pa mas pronto posibel bira miembro di Biblioteka Públiko Boneiru. Te ku 18 aña miembresia ta grátis. Si bo tin mas ku 18 aña bo ta paga $ 6,- pa aña. Miembronan por hasi uso grátis tambe di nos biblioteka online. Pa mas informashon yama 715 – 5344 òf hasi nos un bishita na Kaya Gramèl s/n.  

Related posts

Awe 26 di febrüari 2021 tin 16 kaso aktivo di Covid-19 na Boneiru

EA News Author

Kuerpo di Bombero Hulanda Karibense a repartí alarma di huma

EA News Author

Diputado Den Heyer ta topa ku studiantenan motivá na Hulanda

EA News Author

Leave a Comment