Un encuentro di talento, union y expresion cultural
Dia 30 di mei 2025, un grupo di hoben Arubiano a bay representa nos isla na Boneiro den e competencia regional Arte di Palabra ABC (AdP), cu tambe a coincidi cu e celebracion di e 20 aniversario di Arte di Palabra Boneiro. Aña tras aña, e evento aki ta uni hobennan di Aruba, Boneiro y Corsou den un ambiente di respet, creatividad y amor pa palabra.
E delegacion Arubiano tabata forma pa 11 hoben cu entrega y pasion pa poesia y cuenta:
Caylee Fraser, Alia Hernandez, Samantha Romero Farias, Genevan Maduro, Loubens Occean, Marie-Jayne Vriend, Phillip-Johnson Martinus, G-Xlaine Vrolijk, Eliziën Antersyn y Eden Antersyn. Un presentacion especial tabata di Isdell Hyacinme, cu a representa Aruba na edicion local den categoria di rap y a trece un presentacion como invitado.
Durante e anochi di competencia di AdP ABC a duna reconocemento na dos baluarte cu a ricibi Tapushi Literario. Comision di Arte di Palabra Corsou tur aña ta duna homenahe na personanan cu a duna un contribucion balioso riba tereno di nos idioma Papiamento/u.
E anochi aki Sra. Elsa Krosendijk di Aruba y Sr. Melvin Shaba Meyers di Boneiro a ricibi nan Tapushi Literario. Tambe Sra. Ilse Schoobaar-Anthony, Sr. Dennis Rafael y Sra. Ilse Risseeuw- Winkel di Corsou, a ricibi nan homenahe durante di Arte di Palabra Corsou.
Durante e actividad di aniversario mes dia 30 di mei, Boneiro a brinda un gran bonbini na delegacionnan di e islanan ruman cu un brindis, cena y musica di JC & Friends, den un ambiente di union fraternal y orguyo cultural.
E competencia mes a tuma luga dia 1 di juni na Social Café. Aruba a participa den varios categoria, y dos di nos participante a logra un luga den e top tres:
Alia Hernandez a sali na segundo luga den Categoria B – Poesia Original Klas 1-2
G-Xlaine Vrolijk a sali na segundo luga den Categoria E – Cuenta Original Klas 1-2
E gran ganador absoluto di e edicion 2025 di Arte di Palabra ABC tabata Dazhina Mansveld di Boneiro cu su obra “E misterio di Kòni”.
Departamento di Cultura Aruba ta sumamente agradecido pa e oportunidad pa representa Aruba den un evento cu ta re-alsa e bos di hobennan. Nos ta felicita tur participante di Aruba y tur hoben di e region pa nan esfuerso y balentia pa subi riba escenario y participa den un competencia cu ta honra nos idioma y nos cultura comun.
Pa Aruba, e experiencia aki ta un motibo pa sigui inspira nos hubentud na forma arte di palabra cu pasion y humildad.
